पर्थको उत्तर पूर्वी क्षेत्रमा सोमबारबाट सुरु भएको डढेलो तीव्र गतिमा अघि बढिरहेको बताइएको छ ।
ठुलो हिस्सामा फैलिएको आगोका कारण हाल सम्म ७१ घर जलेर नष्ट भइसकेका छन्।
सोमबार राति आगलागीले ठुलो रूप लिएको बताइएको छ ।
आगलागी पहाडी सहर वरुलोबाट तटीय मैदानमा पुगेको अधिकारीहरूले बताएका छन् ।
अग्नीनियन्त्रकहरुले आगलागी नियन्त्रणका लागि कोसिस जारी राखेका छन् ।
वेस्र्टन अस्ट्रेलियाका आपतकालिन एवम् आगलागी सेवाका कमिस्नर डेरेन क्लेमले क्षति पुगेका घरहरूको सङ्ख्या बढ्न सक्ने बताए ।
क्लेल भन्छन् आगो अत्यधिक छिटो फैलिरहेको छ र निभाउन गार्हो परिरहेको छ ।
हाल सम्म करिब ९ हजार हेक्टर जमिन आगोले नष्ट गरी सकेको बताइएको छ ।
रातिको समयमा मौसम झनै खराब हुन सक्ने र हावाको गति ७५ किलोमिटर प्रतिघण्टा भन्दा बढी हुन सक्ने भएकाले झनै जोखिम रहेको उनले बताए ।
आगलागीका लागि चेतावनी जारी गरिएको क्षेत्र वरपरका बासिन्दालाई आगो नियन्त्रण गर्न सक्ने अवस्थामा नरहेको भए सुरक्षित स्थानमा सर्नका लागि अनुरोध गरिएको छ ।
आगलागीका कारण बिजुली कटौती भएपछि मङलबार करिब २ हजार बासिन्दा एवम् व्यवसायीहरू अध्यरोमा बस्न बाध्य भएका छन् ।
करिब एक सय बिजुलीका पोल एवम् ट्रान्सफरमरहरूमा आगलागीका कारण क्षति पुगेको थियो ।
स्थानीय बिद्युत् सेवा प्रदायकहरूले जोखिमका कारण क्षति पुगेका स्थानमा पुगेर सेवा सुचारु गर्न भने सकेनन् ।
सेवा प्रदायहरूले जलेका पोल एवम् ट्रान्सफर्मर निकाल्नका लागि आपतकालिन विभाग सँग सहकार्य गरिरहेको बताइएको छ ।
राज्यका प्रिमीयर मार्क माक्गावीनले राज्यको ग्रामीण क्षेत्र टिल्डेन पार्कमामा क्षति पुगेका घरहरूमा अग्नि नियन्त्रकहरुले निगरानी राखेको बताए ।
”यो अत्यन्तै खतरनाक आगो र गम्भीर अवस्था हो,मौसमी अवस्था पनि निकै अस्थिर छ । ” उनले भने ।
”कृपया तपाई र तपाईँको परिवारलाई सुरक्षित राख्नुहोस्,एक अर्काको हेरचाह गर्नुहोस् । ” उनले आग्रह गरे ।
आपतकालिन विभागले आफ्नो घर छाडेर सुरक्षित स्थानका लागि बाहिर निस्कएकाहरुले मास्क लगाउन र सामाजिक दुरीका साथ राज्यको कोभिड–१९ नियन्त्रण मापदण्डको ख्याल राख्न आग्रह गरेको छ ।
स्वान भ्यूमा रहेको ब्राउन पार्क रिक्रएसन सेन्टर बीचबोरोमा रहेको स्वान एक्टिभ लगायतका क्षेत्रलाई सुरक्षित रूपमा भेला हुने स्थानमा तोकिएको छ ।आगलागी क्षेत्र भन्दा ३५ किलोमिटर परका सहरी इलाकाका घरहरूमा आगलागीबाट निस्किएको धुवा र खरानी पुगेको स्थानीयहरूले बताएका छन् ।
