नेपालमा दशैंको टिकाको क्रममा आफन्तलाई सौगात को रुपमा पैसा दिने प्रचलन रहेको छ र बर्षौ देखि यो परम्परा चलिआएको छ । र यसका लागि नेपालको राष्ट्र बैंकले नयाँ नोट देशमा भित्राउने पनि गर्ने गरेको छ। तर यस बर्ष भने राष्ट्र बैंकले मगाएको नयाँ नोटहरु कोलकता बन्दरगाहमा अड्किएको समाचार आएको छ। र यसले गर्दा दक्षिणामा प्रयोग हुने नयाँ रुपैयाँको अभाव भएको छ।
नेपाली दैनिक नागरिकका अनुसार, २० र ५० का नयाँ नोट कोलकाता बन्दरगाहमा अड्किएपछि बजारमा अभाव भएको छ । विदेशमा छापेर कोलकाता बन्दरगाहमा ल्याइपुर्याइएका ती नोट दसैंअघि नेपाल ल्याउन नसकिएका कारण अभाव भएको नेपाल राष्ट्र बैंकको भनाइ छ ।
विदेशमा छापिएका नेपाली नोट कोलकातासम्म पानीजहाज र त्यहाँबाट रक्सौलसम्म रेलमा ल्याउने गरिन्छ । त्यहाँबाट सडकमार्ग हुँदै राष्ट्र बैंकको ढुकुटीमा ल्याउने गरिएको राष्ट्र बैंक अधिकारी बताउँछन् । नोट छाप्ने कम्पनीको विशेष निगरानीमा कोलकाता र त्यसपछि भारतका सुरक्षाकर्मी र राष्ट्र बैंकका कर्मचारीले रक्सौलसम्म र त्यसयता नेपाली सुरक्षाकर्मीको रेखदेखमा राष्ट्र बैंकको ढुकुटीसम्म ल्याइने गरेको उनीहरुको भनाइ छ ।
५० रुपैयाँ दरका नयाँ नोट दसैंलाई लक्ष्य गरेर इन्डोनेसियामा छापेर ल्याउन लागिएको थियो । गभर्नर चिरञ्जीवी नेपालको हस्ताक्षर भएको ५० दरका ती नोट पहिलो खेपमा ३ करोड थान ल्याइएको थियो । दोस्रो खेपमा ल्याउन लागिएका ७ करोड थान नयाँ नोट कोलकाता बन्दरगाहामै अड्किएका छन् ।
राष्ट्र बैंकले ५० रुपैयाँ दरका कुल २४ करोड थान र २० रुपैयाँ दरका २१ करोड थान (४ अर्ब २० करोड रुपैयाँ बराबर) का नोट ल्याउँदै थियो ।
