शुक्रवार न्युजिल्याण्डको स्थानीय समय अनुसार दिउँसो करिब १:४५ मा मानिसहरूको भिड रहेको अल नूर मस्जिदमा एक बन्दुकधारीद्वारा पहिलो हमला गरिएको थियो ।
र दोस्रो गोली हमला क्राइष्टचर्चकै लिनवूड मस्जिदमा भएको जनाइएको छ।
हमला भएका मस्जिदहरू मध्ये एकमा कम्तीमा पनि पाँच सयको सङ्ख्यामा मानिसहरू उपस्थित भएको बताइएको छ।
न्युजिल्याण्ड प्रहरी आयुक्त माइक बुसले मृत्यु भएकाहरूमा ४१ जनाले अल नूर मस्जिदमा , ७ जनाले लिनवूड मस्जिदमा र एक जनाले क्राइष्टचर्च अस्पतालमा ज्यान गुमाएको पुष्टि गरेका छन्।
घटनामा संलग्न भएको आशङ्कामा न्युजिल्याण्ड प्रहरीले १ अस्ट्रेलियाली सहित ३ पुरुष र एक महिलालाई पक्राउ गरेको प्रहरी आयुक्त माइक बुसले बताएका छन्।
तर उक्त पक्राउपश्चात् पनि अन्य आक्रमणबाट सहर पूर्ण रूपमा सुरक्षित छन् भनेर विश्वस्त हुन नसकिने भन्दै उच्च सुरक्षा सतर्कता अपनाइएको छ।
२८ वर्षीय अस्ट्रेलियाली भएको बताउँदै एक व्यक्तिले ७४ पेजको घोषणापत्र अनलाइनमा प्रकाशित गरेर आफू घटनामा संलग्न रहेको दाबी गरेका थिए।
उक्त अनलाइन सामग्रीमा उनले यो घटना युरोपमा हजारौँको ज्यान लिइएको घटनाको बदला स्वरूप गराएको दाबी गरेका छन्। तर प्रहरीले घटनालाई आतङ्ककारी आक्रमण हो या हैन भन्ने बारे प्रतिक्रिया दिएको छैन।
हिरासतमा रहेका कोहि पनि सुरक्षाका दृष्टिले खतराको रुपमा निगरानीमा नरहेको बताइएको छ।
घटना भएको क्राइष्टचर्चमा सशस्त्र सेनाहरूलाई परिचालन गरिएको छ भने, क्राइष्टचर्चका विद्यालय, अस्पताल तथा विश्वविद्यालयहरू बन्द गरिएको छ त्यस्तै स्थानीय बासिन्दाहरूलाई घर भित्रै रहन भनिएको छ।
प्रत्यक्षदर्शीहरूले घटनाका बारेमा बताउँदै जताततै रगत देखेको र कतिपयले आफ्नो टाउको माथिबाट बुलेट गएको बताएका छन्।
न्युजिल्याण्ड कि प्रधानमन्त्री जसिन्दा आर्डेनले उक्त घटनालाई न्युजिल्याण्डको इतिहासमा नै सबैभन्दा खराब घटनाको संज्ञा दिदैं यस दिनलाई न्युजिल्याण्डका लागी कालो दिन भनेकी छन्।
आक्रमणकारीले शैन्य शैलीमा शुक्रबारको प्रार्थनाका लागी जम्मा भएका मानिसहरू माथी गोलि चलाएका थिए। आक्रमणकारीले आक्रमण गर्नु भन्दा केहि क्षण अगाडीदेखि आक्रमणको समेत प्रत्यक्ष प्रसारण गरेका थिए।
घटनाका बारेमा पुर्व गुप्तचर तथा रक्षा नीति विशेषज्ञ पल जी बुच्ननले एसबीएस सँग कुरा गर्दै घटना दक्षिणपन्थी उग्रवादी वा दक्षिणपन्थी आतंककारी आक्रमण भएको बताएका छन्।
