मङलबार राति आठ बजे सम्मको गणना अवधिमा न्यु साउथ वेल्समा ९७ जना नयाँ सङ्क्रमित थपिएका छन् ।
न्यु साउथ वेल्समा ९७ नयाँ कोरोना सङ्क्रमित थपिए सँगै ग्रेटर सिड्नी र आसपासमा जारी लकडाउन कम्तीमा पनि दुई हप्ताका लागि थपिने भएको छ ।
आज पत्रकारहरू सँग कुरा गदै न्यु साउथ वेल्सकी प्रिमीयर ग्लेडीज बेरीजीक्लीयनले कम्तीमा पनि ३० जुलाई सम्मका लागि लकडाउन लम्ब्याइएको घोषणा गरेकी छन् ।
नयाँ भेटिएका सङ्क्रमित मध्ये २४ जना सङ्क्रमण अवधिभर पुरा वा आंशिक रूपमा समुदायमा घुलमिल गरेको उनले जानकारी दिइन् ।
नयाँ भेटिएका मध्ये ६० जना भने सङ्क्रमण अवधिभर आइसोलेसनमा रहेको बताइएको छ ।
७ जना सङ्क्रमण अवधिको केही समय आइसोलेसनमा रहेका र अन्य ६ जनाको आइसोलेसनमा बसेको/नबसेको बारेमा अनुसन्धान जारी रहेको पनि स्वास्थ्य अधिकारीहरूको भनाई छ ।
“लकडाउनलाई अन्त्य गर्नु अघि अहिले देखिएका २४ जनाको नम्बरलाई घटाएर शून्यमा झार्नु आवश्यक छ ” उनले भनिन् ।
“दुई हप्ताको अन्त्यमा हामीले अवस्थाको मुल्याङन गर्नेछौ र त्यसपछिको अवस्थाका बारेमा थप जानकारी उपलब्ध गराउनेछौ ।”
हाल न्यु साउथ वेल्समा ७१ जनाको कोरोनाका कारण अस्पतालमा उपचार भइरहेको छ ।
ती मध्ये २० जना मानिस सघन उपचार कक्षमा उपचार गराइरहेका छन् ।
चार जनाको भने भेन्टिलेटरमा उपचार भइरहेको छ ।
राज्यकी मुख्य स्वास्थ्य अधिकारी केरी च्यान्टले सघन उपचारमा रहेका मध्ये एक जना २० वर्ष उमेर समूहका,दुई जना तिस वर्ष हाराहारीका ,दुई जना ४० वर्षका रहेको जानकारी दिइन् ।
अन्य भने ५० वर्ष देखि ८० वर्ष सम्मका मानिसहरू रहेका छन् ।
हाल सङ्क्रमण जोखिम क्षेत्रका रूपमा फेयर फिल्ड,रोजल्याड,रोजबेरी,क्यान्टरबेरी,बेलमोर,सदरल्याण्ड ,सेन्ट जर्ज क्षेत्र ,विन्सर,सेन्ट इभीस,पेनरीथ र बे साईड परेका छन् ।
Share
