फेला परेका तिन मध्ये दुई मामला बेरेलाको पछिल्लो सङ्क्रमण सँग जोडिएको बताइएको छ ।
बाकि रहेको एक मामला भने एभलोन प्रकोप सँग जोडिएको छ ।
सिड्नीको नदर्न बीचेस अन्तर्गत नाराविन ब्रिज क्षेत्रमा लकडाउन अन्त्य भएकै दिन सामुदायिक सङ्क्रमणका मामला फेला परेका हुन् ।
क्रिसमस अघि देखि घरमै बस्नु पर्ने स्वास्थ्य आदेशको आज अन्त्य भएको हो ।
गएको २४ घण्टामा २३ हजार ७ सय ३६ जनामा परीक्षण भएकोमा तिन सङ्क्रमण फेला परेको अधिकारीहरूले बताएका छन् ।
न्यु साउथ वेल्सकी प्रिमीयर ग्लेडिज बेरीजेक्लीयनले जनताले जाँच गर्नमा देखाएको तत्परताको प्रशंसा गरेकी छन् ।
यद्यपि सर्तक रहन जरुरी रहेको उनको भनाई रहेको छ ।
प्रिमीयरले नदर्न सिड्नीका जनताले सरकारको स्वास्थ्य आदेशलाई पूर्ण पालन गरी साथ दिएकोमा धन्यवाद पनि दिइन् ।
“विगत चार हप्ता नदर्न बीचेस क्षेत्र विशेष गरी उत्तरी खण्डका मानिसहरूले देखाएको सदाशयताको सराहना गदछौ ।” उनले भनिन् ।
राज्यकी मुख्य स्वास्थ्य अधिकारी केरी च्यान्टले आगामी १४ दिन कोरोनाको जाँचलाई अधिकतम राख्नु महत्त्वपूर्ण रहेको बताइन् ।
“आगामी १४ दिन र त्यसपछि पनि परीक्षणको दरलाई उच्च बिन्दुमा राख्नु जरुरी रहेको छ । ” उनले भनिन् ।
यता ग्रेटर ब्रिसबेन क्षेत्र तिन दिने लकडाउनको दोस्रो दिनमा रहँदा आज त्यहाँ कोरोनाका कुनै नयाँ सङ्क्रमण फेला परेका छैनन् ।
१ सय ४७ जना सङ्क्रमित निकट रहेका मानिसहरू फेला परेका छन् ।
ती मध्ये १ सय १२ जनाको जाँच भएकोमा उनीहरूको रिर्पोट नकारात्मक आएको छ ।
यता भिक्टोरियामा लगातार चौथो दिन पनि सामुदायिक सङ्क्रमणको मामला शून्य देखिएको छ ।
विदेशबाट आएर होटेल क्वारीनटीनमा रहेका ६ व्यक्तिमा भने कोरोना सङ्क्रमण पुष्टि भएको छ ।
