म्यानमारकी पा ही १४ वर्ष अघि शरणार्थीका रुपमा अस्ट्रेलिया आएकी हुन् ।
कोरोना माहामारिका दौरान लकडाउन हुँदा उनका पतिले जागिर गुमाउन पुगे ।
अबका दिनमा कसरी गुजारा चलाउने भन्ने कुराले उनलाई तनाव दियो ।
“मेरो सानो बच्चा भएका कारण काम गर्न जान सक्ने परिस्थिति थिएन ।” उनले एस बि एस सँग भनिन् ।
“म सँग घर भाडा तिर्नका लागि पनि आवश्यक रकम थिएन ।”
परिवारले जवकिपर पाउने त भए तर त्यतिले नपुग्ने भएपछि जेनतेन जम्मा गरेको रकम प्रयोग गर्नु पर्ने भयो ।
“मेरो श्रीमानले सुपरबाट दश हजार डलर झिक्नु भयो ।”
तर यो आर्थिक समस्याबाट गुज्रिएको उनको परिवार मात्र एक्लो होइन ।
कन्जुमर पोलिसि रिसर्च सेन्टरले गत नोभेम्बर/डिसेम्बरमा लकडाउनको अन्त्य हुँदै गर्दा करिब दुई हजार परिवारका बिचमा सर्वेक्षण गरेको छ ।
उक्त संस्थाले यस हप्ता आफ्नो अनुसन्धान रिपोट सार्वजनिक गरेको हो ।
जसमा बहुसांस्कृतिक विविधता भएका समुदाय माहामारिका बेला सबैभन्दा बढी समस्यामा परेको देखिएको छ ।
यो समयमा बहुसांस्कृतिक समुदायका मानिसहरूले अन्य मानिसले भन्दा दुई गुण बढी व्यक्तिगत ऋण लिएको र चार गुणा बढी अन्य किसिमका ऋणहरू लिएको देखिएको छ ।
सुपर निकाल्नेका हकमा पनि उनीहरू अन्य अस्ट्रेलियन भन्दा दुई गुणाले अगाडी देखिएका छन् ।
आपतकालिन सहायता खोजीमा पनि उनीहरू चार गुणाले अघि छन् ।
“हाम्रा लागि वास्तवमै यो कुराले चासो देखाएको छ कि बाकी जनसङ्ख्याको तुलनामा बढी जोखिम,उच्च लागतका ऋणमा उनीहरूको पहुँच निकै बढी छ ।” उपभोक्ता नीति अनुसन्धान केन्द्रकी प्रमुख लरेन सोलोमनले भनिन् ।
गत नोभेम्बरमा मात्र पनि बहुसांस्कृतिक समुदायका करिब २२ प्रतिशत मानिसले घर भाडा तिर्न छुटाएका छन् ।
अन्य जनसंख्यामा हेर्ने हो भने यो केवल ६ प्रतिशत मात्रै छ ।
जसको परिणाम आर्थिक तनाव सिर्जना भएको छ ।
बहुसांस्कृतिक समुदायका ७३ प्रतिशत मानिसहरू आफ्नो आर्थिक कल्याणका बारेमा चिन्तित छन् ।
माइग्रेसन काउन्सिल अफ अस्ट्रेलियाकी प्रमुख कार्यकारी कार्ला विलसायर भन्छिन् अङ्ग्रेजी भाषा राम्रो सँग नबुझनेहरुले भुक्तान योजना र अन्य वित्तीय सहयोग सम्बन्धी सूचना गुमाएका कारण अझ समस्या बढेको छ ।
“दोस्रो भाषाका रूपमा अङ्ग्रेजी हुनुले पर्याप्त वित्तीय सल्लाहमा पहुँच गर्नका लागि अतिरिक्त अवरोधको सिर्जना गर्दछ ।” उनले भनिन् ।
“कोभिड–१९ को नतिजा मध्ये एक यो हो कि आप्रवासी वा शरणार्थीहरू पहीलोपटक आउँदा, उनीहरूलाई सहयोग गर्ने सयंन्त्रहरुलाई अझ बढी ध्यान दिनु आवश्यक छ । ”
विद्यार्थी एवम् वकिङ होलिडे भिसामा आएका मानिसहरूलाई यो समयमा आर्थिक कठिनाईबाट गुज्रनु परेको तथ्याङले देखाउछ् ।
उनीहरूसँग पक्का जागिर नभएका कारण आयमा अस्थिरता देखिएको बताइन्छ ।
अनुसन्धानकर्ताहरुले वित्तीय जानकारी विभिन्न भाषामा उपलब्ध हुनु पर्नेमा पनि जोड दिएका छन् ।
सोलोमन भन्छिन् “यो सङ्कटबाट हामी एकैसाथ बाहिर निस्कन चाहन्छौ,हाम्रा ग्राहक सेवा समावेशी हुनु जरुरी छ,यसको मतलब यो व्यापक जनसङ्ख्यामा पहुँचयोग्य हुनु जरुरी छ–जसले हाम्रो समुदाय र समाजलाई अझ बढी सुदृढ बनाउछ ।”
अस्ट्रेलियाको पछिल्लो समाचार तथा अन्य सामाग्री नेपाली भाषामा सुन्न यहाँ थिच्नुहोस्
