बेलायतबाट आएको भनिएको कोरोनाको अत्यन्तै सङ्क्रमित रुपका बारेमा चासो र चिन्ता बढ्दै जाँदा राष्ट्रिय मन्त्रीपरिषद्को बैठकले घरेलु एवम् अन्तर्राष्ट्रिय विमान यात्राका क्रममा नयाँ उपायहरू अवलम्बन गर्ने जनाएको हो ।
बैठकमा ग्रेटर ब्रिसबेन क्षेत्रलाई “हटस्पट” का रूपमा घोषणा गरिएको छ ।
होटेल क्वारीनटीनमा काम गर्ने एक महिलामा कोरोना पुष्टि भए पछि ब्रिसबेनमा तिन दिने लकडाउन गरिएको छ ।
अवलम्बन गरिएका नयाँ उपायहरूमा अस्ट्रेलियाका लागि विमान चढ्नु पूर्व यात्रुले कोरोना नेगेटिभ रहेको रिपोट अनिवार्य देखाउनु पर्ने भएको छ ।
बेलायतबाट आउने यात्रुहरूले पनि कोरोनाको ऱ्यापिड जाँचको रिपोट अनिवार्य देखाउनु पर्ने भएको छ ।
यसै गरी घरेलु र अन्तर्राष्ट्रिय विमानका यात्रुहरूले मास्क अनिवार्य लगाउनु पर्ने नियम बनाइएको छ ।
“भाइरसले आफ्नै नियमहरू बनाउँदै गएकाले यस सँग लड्न हामी पनि तैयार हुन जरुरी छ ।” प्रधानमन्त्रीले भने ।
विदेशबाट आउने मानिसको संख्यामा कटौती
यसैबिच क्विन्सल्याण्ड,वेस्र्टन अस्ट्रेलिया र न्यु साउथ वेल्समा विदेशबाट आउने यात्रुको सङ्ख्यामा कटौती गरिने भएको छ ।
कटौती सँगै अब न्यु साउथ वेल्समा हप्तामा १५ सय ५ , वेस्र्टन अस्ट्रेलियामा ५ सय १२ र क्विन्सल्याण्डमा ५ सय मानिसहरू मात्र विदेशबाट भित्रन पाउनेछन् ।
भिक्टोरियाले भने हप्तामा ४ सय ९० यात्रुको आगमनको सीमालाई यथावत् राख्नेछ ।
शुक्रवार राज्य र टेरीटरीका नेताहरू सँगको छलफल पछि उक्त निर्णय लिइएको हो ।
विदेशबाट अस्ट्रेलिया आउनका लागि दर्ता भएका ८० प्रतिशत मानिसहरू रहेको स्थानमा भाइरसको बेलायती रूप पुगी सकेको मोरीसनले बताए ।
मुख्य स्वास्थ्य अधिकारी पाउल केलिले अत्यन्तै सङ्क्रमण फैलाउने भाइरसको नयाँ रूपमा “कढा,छिटो र बलियो” योजनाका आवश्यकता भएको बताए ।
“हाम्रो मुख्य उद्देश्य अस्ट्रेलियालीहरूलाई सुरक्षित राख्ने हो, यो भाइरसको सङ्क्रमण अन्य स्थानमा नफैलियोस् भन्ने उद्देश्य हो ।” उनले भने ।
“कारण यो हो कि यसको रोकथाम निकै गार्हो छ ।” उनले भने ।
यो सँगै होटेल क्वारीटीनमा काम गर्ने मानिसलाई हरेक दिन कोरोना जाँच गरिने भएको छ ।
अन्तर्राष्ट्रिय उडान दलका सदस्यहरूले प्रत्येक ७ दिन वा अस्ट्रेलिया आएको दिनमा कोरोना जाँच गराउनु पर्ने नियम राखिएको छ ।
अर्को उडान नभए सम्म निर्धारित स्थानमा क्वारीटीनमा रहनु पर्ने पनि नियम राखिएको छ ।
हाल करिब ३८ हजार मानिसले अस्ट्रेलिया आउन निवेदन दिएका छन् ।
