Nyurruwiyi kujalpalu nyinaja yapa jurlpu-pinki manu marlu-pinki-wiyi, karntalpa nyinaja kurdu-wirriya-jarrakupalangu Jukurrpa. Mirntangarli ngulalu yanu wirlinyi kuyuku manu yarlaku.
Wirlinyirlalku, ngati-nyanurlu-palangu ngarrurnu kaja-nyanu-jarraju. “Nati-pala yanta kulirra ngapa-kurra juju ngapa-ngawurrpa-kujaku.” Junga-juku, pina-nyangu-pala ngatinyanuju.
Ngula-warnuju, pungulpalu kuyu manu karlajalpalu yarla.
Ngula-jangkaju, yanu-pala manyukurra ngarrirninja-warnu. Ngatinyanurlujulpa waparlkurlu karlaja. Wirriya-jarrarlu-pala pina-nyangu jurlpu wirnpirlinja-kurra ngatijirri-piya.
Nyangulpa-pala tarnngangku. Kutujarrijalku-pala wirriya-jarraju.
Ngula-jangkaju jurlpuju paarr-pardija watiya-ngurluju jinta-kari-kirra watiya-kurra. Ngula-palangu nguru-kangu yuwurrku-kurra manu-palangu palka-jarrija kula-nganta jurlpu, kala ngapa-wardingki juju.
Ngula-jangkaju-palangu jirri-mardarnu wirriya-jarraju. Kilji-pala purlaja wirriya-jarraju. Lawa-juku-palangu muru-pungu tarnnga ngapangka jujungkuju.
Warlpalpa wangkajarni kurlarni ngula-palangu pina-nyangu purlanja-kurra ngati-nyanurluju. Lawa-nyangu-palangu. Parnkajarla karnta-kariki. Payurnu, “Nyangunpalangu
ngaju-nyangu-jarra kurdu jirrama?”
Karntaju wangkaja, “Lawa nyanja-wangu ngajuju.”
Ngula-warnurluju manngu-nyangu, “Kari-waja ngapangka marda.” Junga-juku parnkaja nyanjaku kurlirra ngapa-kurra. Nyangu warrulparla wirliyaku lawa-juku. Ngula-jangkaju
nyangulku ngapa yalyu-kurlu. Yulanjaku jati-jarrija. Pakarnu-nyanu watiyarlu jurruyalyu-kurra.
Yulanjayanu ngurra-kurra. Pakarninjayanulpa-nyanu yalyu-kurra.
Yulajarra mungangkaju. Yalyujulpa karlija rduku-rduku-wanalku, manu mungalyurruju
lawa-jarri-jalku yalparu karntaju.
Ngula-jangkaju rduku-rduku-tirirtirijarrijalku ngulaju jurlpu wita jinjiwarnu.
Jalangurlu kanpa nyanyi jurlpu wita yangka rduku-rduku yalyu-yalyu pakarninja-warnu, yalyu ngulalpa karlija yapa-wiyi.
Jukurrpa Yimi Kirli
Jukurrpa stories watiji kalu ngurrju mani PAW Media, rla yangka yapa kurlangu media organisation remote community Yuendumu, rla NT, rla. Yimi watiji kalu ngurrju mani Bilingual Resource Development Unit, rla Yuendumu, rla, ngalya karirlangu warlpiri yimi teaching resources wati kirli.
Voiced by: Louanna Williams
Recording and Sound Design: Esau Japanangka Marshall
Story: Anthony Egan Jampijinparlu
Podcast Tile Image: Mina Mina Jukurrpa (Mina Mina Dreaming), Jeanie Napangardi Lewis, Warlukurlangu Artists
