Napurrurlalpa nyinaja jukurrpa nyurruwiyi
Yajarlurla kujalpa yalumpu yarlaku-lparla pangurnu.
Yangkalpa ngamardi-nyanurluju-lparla pangurnu walya kaninjarra.
Rdakulpa pangurnu, kurdulpa jakati-yirrarnu manu kiripi-kangulpa tarnnga. Yalumpurla-jukulpa yirrarnu parra-kari manu parra-karilpa jakati yirrarnu.
Parra-kari manu parra-karilpa yirrarnu.
Nyanungurlu-julpa yangka-juku pangurnu kaninjarra-nyayirni. Pangurnulpa Yajarlurlaju, pangurnulpa karntangku.
Ngamirdi-nyanurlujulpa pangurnu. Kurdulpa kiripi-kiripi-kangu.
Ngula mardukuja jinta-kari yanurnu kurlirra-ngurlu kurdu-kurlu, mingarlpinji-piya-kurlu, yuntardi-wangu, ngawu-kurlu, nyanjaku-nganta yungu yanu.
Parlu-pungu kurdu kiripi-kanja-kurra,
“Kukurna yani nyanjaku nyampuku yatijarra.
Kukurna nyanjaku yani-waja. Yii ! Kurdu nyampu ka nyinami ngurrju-nyayirni. Nyarrpa-manirna kurdu nyampuju?”
Karlarralpa wapaja. Pina yanurnulpa kurduku. Nyangulpa, pina yanurnu. “Kari, kurdu nyampuju yuntardi-nyayirni. Manirna ? Kanyirna kurdu? Nyampulku-rnarla kuntuly-yirrarni.”
Yijardurla yirrarnu.
Napurrurlarlujulpa waparlku pangurnu nyanja-wangurlu yali karnta-kari lawa. Wilypi-pardija, nyangu.
“Ya! Kurdu nyampuju nyarrpara-malu yirrarnu?
Kala kurdu ngaju-nyangu?”
Walilparla warrurnu. Warru wapajalpa. Kujalparla warrurnu yangkaku nyangulparla.
“Nganangkuju kurduju jurnta-manu?
Nyarrpara-wana wirliyaju?”
Wapajalpa. Warru-wapajalpa. Warrurnulparla wirliyaku. Nyangulparla.
“Nyarrpara nyanungu yapa yanurnu?
Wuu! Yijardu yarntarnparni-kangu nyampu-wana.
Kurlarni nyampu-mayi yanu kurlirra? Kurdu nyanungu-nyangu kula pina manurra. Kurdu ngaju-nyangu-mipa kangu.”
Kangurla pina yinya kurlulumpayi yinya Karnilpakurra.
Karnilpa yangka Yamurnturrngurla kutu kuja kurlarni-nyarra ngunami pirli japiya, kanjarlarla yinjarnu, ngula-kurrarla kangu. Yungurla.
“Warlalja karnaju nyampuju kurdu mani, yungunpaju purunjurlu jurnta-kangu. Warlalja karnaju mani.”
Walilpa kurnta-karra nyinaja.
“Kurdu nyampu manta nyuntu-nyangu.”
Kangu, kurdu nyanungu-nyangu Yajarlu-kurra.
Ngurra-kurra pina kangu.
Nyinajalpa-pala tarnngalku yalumpu kaninjarra yangka jurrku-kurra. Yaninjarla yalumpu-juku-pala yukaja, Yajarlurla, kujaka jukurrpa ngapa muljungka ngunami tarnnga-juku.
Ngulajuku.
Jukurrpa Yimi Kirli
Jukurrpa stories watiji kalu ngurrju mani PAW Media,rla yangka yapa kurlangu media organisation remote community Yuendumu,rla NT,rla. Yimi watiji kalu ngurrju mani Bilingual Resource Development Unit,rla Yuendumu,rla., ngalya karirlangu warlpiri yimi teaching resources wati kirli.
Voiced by Louanna Williams
Recording and Sound Design: Esau Japanangka Marshall
Story: Jack Ross Jakamarrarlu manu Kay Ross Napaljarrirli
Extra Translation: Theresa Napurrurla Ross
Podcast Tile Image: Mina Mina Jukurrpa (Mina Mina Dreaming), Jeanie Napangardi Lewis, Warlukurlangu Artists
