Nyurruwiyi, yapalpalu tarnnga nyinaja kuyu-wangu. Wati jinta-puka yanu kaja-nyanu-kurlu wurnturu-nyayirni, kuyuku-purda.
Ngaka-pala yanu karlarra. Kula-pala nguru yali-kirra yanu kamparru-wiyi. Kulalu yapa-rlangu yantarla nguru yali-kirra. Kala juju nyinaja warnayarra.
Yanu-pala wurnturu manangkarra-wana, pirli-wana-kurra. Yanu-pala pirli-kirra kanyarlaku-purda.
Wuraji-wuraji, yanu-pala pirli-wiri-kirra. Warrkarnu-pala pirlingka. Warlpa wiri yarnkajarni. Ngula-palangu warnayarralku jangkardu wilypi-pardija. Warnayarraju wiri-jarlu-nyayirni wilypi-pardija kankarlarra-kari, ngula muku kujurnu watiya manu pirli.
"Yakarra! Nyangka ngula wiri-jarlu-nyayirni kujaka warnayarraju wilypi-pardimi walya-ngurlu".
"Wara! Parnkamirli ngula-kujaku!" Wati-jarraju lani-pala parnkaja karlarra. Ngula-ngurlu-juku-pala pirli-ngirli jitija kaninjarra-kari. Parnkanjarla-pala nyinaja mata.
"Warlu-ngalingki manta, pirriyarla!"
Nganturnu-pala-nyanu yunta warlpa-kujaku, mungangka-juku, manu-pala-nyanu warlu yarrpurnu. Ngunanja-wantija-pala warlu-wana yuntangka.
Ngula-pala jarda-jarrija wita ngulangka-juku. Ngula-pala purda-nyangu linpalku warlpa-piya. Nyangulku-pala juju warnayarra. Palka-manu-palangu ngunanja-kurra. Yakarra-pardinjarla jaji-nyanu jiily-ngarrurnu warnayarraju.
"Warlu wirirli mayangku yarrpirni!"
Yayiyayiyarra parnkanja-yanu warnayarraju, kankarlarra-kari.
Jaji-nyanurla purlaja kaja-nyanuku,
"Yanirli yaruju! Juju-kujakurlu yani!"
"Yuwayi f Kakarrararlu pina yani jalangujuf Yali rdingki-wanarlu yanil"
Junga-juku-pala parnkaja jaji-rlanguju. Wurnturu-pala yanu ngula purlkaju mata-jarrija.
"Nyampu-wajarlu ngunami wita. Matarna! Yuntarlu-nyanu ngantirni, pirriyarla. Manu-ngalingki warlu yarrpika!".
Ngulajangkaju-pala jarda-jarrija.
Jarda-jukulpa-pala lalka ngunaja.
Ngula warlpa wirilpa wangkaja. Kaja-nyanu yakarra-pardija. Nyangu warnayarralku wilypi-pardinja-kurra kutu-nyayirni. Ngula warlu ngiji manu kaja-nyanurluju.
Jaji-nyanuju ngulalpa puta yakarra-pardija Iani-karra-1ani-karra murnma, ju ku.
Nyanungujulpa kafrija warnayarru-kan rlarra-karilki. Warlu-pala rdiji-rdiji-kangu. Jaji-nyanu purlaja,
"Warlu wiri mayangku yarrpika."
Warnayarraju wiri-jarrijalku.
Ngula-pala-nyanu wangkaja,
"Yanirli wankaruku, kalaka-ngalingki pinyi".
Ngulalpa warnayarraju pingka-juku kanunju-jarrinja-yanu, manulpa pina yukanja-yanu ngulyangka kuja wilypi-pardija.
Wati-jarra-pala mungangka-juku, lani pina yanu pirli-wana kakarrara warnayarra-kujaku. Pirli-wana manu manangkarra-wana-pala parnkaja warrarda munga-wana mungalyurru-karda.
Ngula-jangka, mungalyurrulku, wati-jarraju-pala pina parnkaja lani yimi-kirli ngurra-kurralku.
Kaja-nyanu-wiyi parnkaja warnkiri-maninjaku yapa panu-kurra ngarrurdalku. Ngulalu-jana yapangkuju wapirdi parlu-pungu, manulu-jana wapirdi payurnu.
"Nyiyarla kanpa laniji parnkamirni?
Nyiyanpa nyangu?"
Ngula-pala-nyanu yaninjarla yimi ngarrurnu nyant.Jngu-nyangu warlalja-kurraju.
"Ngayirli-jarra nyangu warnayarra wiri-jarlu-.nyayirni. Jangkardu-jarrangku wilypi-pardija."
Ngurrangka-pala karnta-jarraju waparlku-nyinaja nyanungu-parnta-jarra. N"yangu-pala-jana yujuku-ngurlu parnkanja-warnu-jarra wangkan ja-kurra wati-jarraju kujalu-jana yimi-ngarrurnu yapa-patuku warnayarra.
"Yuwa! Nyiyarla! Nyiyarlungku-pala nyangu kujanpala lani parnkajarni pina kuyu-wangu-juku?"
"Warnayarra wiri-jarlu-nyayirnirli jarrangku puta pungu ngajarrju yali-wardingkirliji".
Purda:.nyanjarla, wangkajalu-jana karnta-jarraju yapa-patuku,
"Yanirlipa nguru nyampu-kujaku.
Kakarrara-rlipa yani warnayarra-kujaku."
Junga-juku yapa-patujulpalu yaninjaku-ngarntilki nyinaja. Kuja wiraji-wiraji-jarrijalku, ngulajulu yanulku walyka-purulku. Kuja-jana munga-jarrijalku, manulu nyangulku pirli-wana-kurra nyanungulku warnayarralku kujalpa warlu-piya jankaja.
Manulu yapaju wangkaja,
"Wara! Nyangkalu kuja-kurra warnayarraju wilypi-pardijalku. Junga-jukunpala wangkaja. Kajirlipa yalirla nyinayarla, kapi-ngalpa pungkarla warnayarrarluju. Nguru yaliji warnayarra-kurlangu-juku."
Junga-juku yanulu yapa-patuju nguru-kari-kirra kakarrara. Manulpalu tarnnga nyinaja ngurrangkaju kakarrara. Manu kalalu wirlinyi wapaja kuyuku-purda warnayarra-wangurlalku.
Jukurrpa Yimi Kirli
Jukurrpa stories watiji kalu ngurrju mani PAW Media, rla yangka yapa kurlangu media organisation remote community Yuendumu, rla NT, rla. Yimi watiji kalu ngurrju mani Bilingual Resource Development Unit, rla Yuendumu, rla, ngalya karirlangu warlpiri yimi teaching resources wati kirli.
Voiced by: Esau Japanangka Marshall
Recording and Sound Design: Esau Japanangka Marshall
Story: June Napanagardi, Tess Napaljarrirli, Helen Napurrurlarlu
Extra Translation: Theresa Napurrurla Ross
Podcast tile image: Mina Mina Jukurrpa (Mina Mina Dreaming), Jeanie Napangardi Lewis, Warlukurlangu Artists
