د کرونا وېروس له محدودیتونو وروسته د افغانستان د روغتیا برخې کار کوونکي هڅه کوي ترڅو د دغه هېواد په کلیو او ښارونو کې په میلیونونو ماشومانو د پولیو واکسین تطبیق کړي.
راپورونه ښيي چې د کرونا ویروس وبا او په افغانستان کې نا امنۍ د دې لامل ګرځېدلي ترڅو د ماشومانو د ګوزڼ په پېښو کې زیاتوالی راشي.
د افغانستان د عامې روغتیا وزارت وايي چې په ۲۰۲۰ کال کې د پولیو د لومړي ډول ۵۶ پېښې او د دویم ډول شاوخوا ۳۰۰ پېښې په دغه هېواد کې ثبت شوي.
عادله محمدي د افغانستان په کابل ښار کې د واکسیناتورې په توګه کار کوي، هغه وايی چې یو شمېر خلک ورته د خپلو کورونو دروازې نه خلاصوي او نه غواړي ترڅو ماشومان یې د پولیو واکسین ترلاسه کړي.
