د ټېلسټرا (Telstra) شرکت تیاری نیسي ترڅو د اګست په ۳۱مه نېټه، د ۳جي (3G) خدمتونه بند کړي.
پر ټېلسټرا سربیره د آسټرالیا نورې مخابراتي شبکې هم غواړي د ۳جي خدمتونه بند کړي. د اپټس (Optus) مخابراتي شرکت به په سپتمبر، ټي پي جي (TPG) او ووډافون (Vodafone) د راتلونکي کال په جنورۍ میاشت کې د ۳جي شبکې خدمتونه بند کړي.
په آسټرالیا کې د ۴جي او ۵جي خدمتونو په پراخېدو سره مخابراتي شبکې د ۳جې خدمتونه بندوي.
مګر د مخابراتو د صنعت وروستۍ شمېرې ښيي چېې تر۵۳۰ زرو آسټرالیایان داسې وسایل لري چې د ۴جي (4G) شبکې سره مطابقت نلري. په دې معنی چې د ۳جي د خدمتونو په بندېدو سره به دغه کسان له جدي ستونزو سره مخ شي او وبه نشي کولی د بېړنیو خدمتونو شمېرې (۰۰۰) ته زنګ ووهي.
د آسټرالیا د مخابراتو وزیرې میشل راولند ویلي چې دغه شمېرې د "ژورې اندیښنې وړ" دي.
هغې ویلي چې د مخابراتي خدمتونو وړاندې کوونکي له اغیزمنو پیرودونکو سره اړیکه نیسي او دا کاروونکي باید اقدام وکړي.
زموږ خپرونه دلته پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
شریکول
