ਵਿਕਟੋਰੀਆ ਪੁਲਿਸ ਦੀ ਕ੍ਰਾਈਮ ਇਨਵੈਸਟੀਗੇਸ਼ਨ ਯੂਨਿਟ ਨੇ ਪਿਛਲੇ 13 ਸਾਲਾਂ ਤੋਂ ਲਾਪਤਾ ਲਵਪ੍ਰੀਤ ਚੀਮਾ ਦੀ ਭਾਲ ਲਈ ਆਮ ਜਨਤਾ ਦੀ ਮਦਦ ਮੰਗੀ ਹੈ।
ਹੁਣ 39 ਸਾਲ ਦਾ ਲਵਪ੍ਰੀਤ ਆਸਟ੍ਰੇਲੀਆ ਵਿੱਚ ਪੜ੍ਹਾਈ ਕਰਦਾ ਸੀ ਅਤੇ ਲਾਪਤਾ ਹੋਣ ਤੋਂ ਪਹਿਲਾਂ ਉਹ ਪ੍ਰਿੰਸੇਸ ਸਟ੍ਰੀਟ, ਕਊ ਵਿਖੇ ਰਿਹਾਇਸ਼ ਕਰਦਾ ਸੀ। ਪਰ ਉਸਦਾ 2005 ਤੋਂ ਬਾਅਦ ਭਾਰਤ ਵਿੱਚ ਆਪਣੇ ਪਰਿਵਾਰ ਨਾਲ ਕੋਈ ਸੰਪਰਕ ਨਹੀਂ ਹੋਇਆ।
ਉਸਦੇ ਲਾਪਤਾ ਹੋਣ ਦੀ ਰਿਪੋਰਟ 2015 ਵਿੱਚ ਕੀਤੀ ਗਈ।
ਗੁੰਮਸ਼ੁਦਗੀ ਤੋਂ ਪਹਿਲਾਂ ਲਵਪ੍ਰੀਤ ਓਕਲੇ ਇਲਾਕੇ ਵਿੱਚ ਕੰਮ ਕਰਦਾ ਸੀ ਅਤੇ ਡਾਂਡੇਨੋਂਗ ਅਤੇ ਸਨਸ਼ਾਈਨ ਵਿੱਚ ਰਹਿੰਦਾ ਸੀ।
ਪੁਲਿਸ ਅਤੇ ਉਸਦੇ ਪਰਿਵਾਰ ਨੂੰ ਇੰਨੇ ਲੰਮੇ ਸਮੇਂ ਤੋਂ ਉਸਦੀ ਗੁੰਮਸ਼ੁਦਗੀ ਕਾਰਨ ਉਸਦੇ ਹਾਲਾਤਾਂ ਬਾਰੇ ਗੰਭੀਰ ਚਿੰਤਾ ਹੈ।
ਪੁਲਿਸ ਵੱਲੋਂ ਉਸਦੀਆਂ ਤਸਵੀਰਾਂ ਜਾਰੀ ਕੀਤੀ ਗਈਆਂ ਹਨ ਤਾਂ ਜੋ ਉਸ ਦੀ ਪਹਿਚਾਨ ਕਰਕੇ ਆਮ ਲੋਕਾਂ ਵਿੱਚੋਂ ਕੋਈ ਉਸ ਬਾਰੇ ਜਾਣਕਾਰੀ ਦੇ ਸਕੇ।
ਲਵਪ੍ਰੀਤ ਦਾ ਕੱਦ 173 ਸੈਂਟੀਮੀਟਰ, ਅਤੇ ਉਸਦਾ ਸ਼ਰੀਰ ਪਤਲਾ ਹੈ। ਉਸਦੇ ਵਾਲ ਅਤੇ ਅੱਖਾਂ ਕਾਲੇ/ਭੂਰੇ ਰੰਗ ਦੀਆਂ ਦੱਸੀਆਂ ਗਈਆਂ ਹਨ।
ਜੇਕਰ ਕਿਸੇ ਨੂੰ ਵੀ ਲਵਪ੍ਰੀਤ ਬਾਰੇ ਜਾਂ ਉਸਦੇ ਠਿਕਾਣੇ ਦਾ ਪਤਾ ਹੋਵੇ ਤਾਂ ਪੁਲਿਸ ਵੱਲੋਂ ਕ੍ਰਾਈਮ ਸਟੋਪਰਸ ਨੂੰ 1800 333 000 ਤੇ ਜਾਣਕਾਰੀ ਦੇਣ ਦੀ ਅਪੀਲ ਕੀਤੀ ਗਈ ਹੈ।
