ਹਮੇਸ਼ਾਂ ਹੀ ਹਸੂੰ ਹਸੂੰ ਕਰਦੇ ਹੋਏ ਸੇਵਾਦਾਰਾਂ ਸਦਕਾ ਹੀ ਭਾਈਚਾਰਕ ਕੰਮ ਸਹਿਜੇ ਹੀ ਨੇਪਰੇ ਚੜ ਸਕਦੇ ਹਨ। ਰਣਜੀਤ ਸਿੰਘ ਅਤੇ ਕੁਲਵੰਤ ਕੌਰ ਅਨੇਕਾਂ ਹੀ ਹੋਰ ਸੇਵਾਦਾਰਾਂ ਵਿੱਚੋਂ ਇੱਕ ਹਨ, ਜਿਨਾਂ ਨੇ ਖੇਡਾਂ ਦੇ ਤਿੰਨੋ ਹੀ ਦਿੰਨ ਜੀ ਤੋੜ ਸੇਵਾ ਕੀਤੀ।
ਭਾਈਚਾਰੇ ਦੇ ਸਾਰੇ ਛੋਟੇ ਵੱਡੇ ਕੰਮ ਭਾਈਚਾਰੇ ਦੇ ਲੋਕਾਂ ਦੀ ਮਦਦ ਤੋਂ ਬਿਨਾਂ ਨੇਪਰੇ ਚੜ ਹੀ ਨਹੀਂ ਸਕਦੇ। ਅਤੇ ਪੰਜਾਬੀ ਭਾਈਚਾਰੇ ਨੂੰ ਮਾਣ ਹੈ ਕੁੱਝ ਅਜਿਹੇ ਵਲੰਟੀਅਰਸ (ਸੇਵਾਦਾਰਾਂ) ਉੱਤੇ ਜੋ ਕਿ ਹਮੇਸ਼ਾਂ ਹੀ ਮਦਦ ਕਰਨ ਲਈ ਤਿਆਰ ਬਰ ਤਿਆਰ ਰਹਿੰਦੇ ਹਨ।
ਸੇਵਾਦਾਰਾਂ ਦੀ ਗੱਲ ਕਰੀਏ ਤਾਂ ਸਿਡਨੀ ਵਾਸੀ ਰਣਜੀਤ ਸਿੰਘ ਅਤੇ ਉਹਨਾਂ ਦੀ ਧਰਮ ਪਤਨੀ ਕੁਲਵੰਤ ਕੌਰ ਦਾ ਨਾਮ ਬੜੇ ਮਾਣ ਨਾਲ ਲਿਆ ਜਾ ਸਕਦਾ ਹੈ।
ਸਿਡਨੀ ਵਿਚਲੀਆਂ ਸਿੱਖ ਖੇਡਾਂ ਲਈ ਇਹਨਾਂ ਦੋਹਾਂ ਨੇ ਜਾਣਕਾਰੀ ਪ੍ਰਦਾਨ ਕਰਨ ਵਾਲੇ ਡੈਸਕ ਤੋਂ ਲੈ ਕਿ ਲੰਗਰ ਤੱਕ, ਦੇ ਹਰੇਕ ਖੇਤਰ ਵਿੱਚ ਭਰਪੂਰ ਸੇਵਾ ਕੀਤੀ।
ਹਮੇਸ਼ਾਂ ਮੁਸਕਰਾਂਦੇ ਰਹਿਣ ਵਾਲੇ ਇਸ ਜੋੜੇ ਦਾ ਕਹਿਣਾ ਹੈ ਕਿ ਇਹਨਾਂ ਨੂੰ ਆਪਣੀ ਪਹਿਚਾਣ ਅਤੇ ਹੋਂਦ ਉੱਤੇ ਮਾਣ ਹੈ ਅਤੇ ਭਾਈਚਾਰੇ ਵਾਸਤੇ ਹਮੇਸ਼ਾਂ ਕੰਮ ਕਰਦੇ ਰਹਿਣਾ ਚਾਹੁੰਦੇ ਹਨ।
ਕੁਲਵੰਤ ਕੌਰ ਜੀ ਵਿੱਚ ਜਿੱਥੇ ਸੇਵਾ ਕਰਨ ਦੀ ਭਾਵਨਾਂ ਕੁੱਟ ਕੁੱਟ ਕੇ ਭਰੀ ਹੋਈ ਹੈ, ਉੱਥੇ ਨਾਲ ਹੀ ਬਹੁਤ ਸੁਰੀਲੀ ਅਵਾਜ ਵੀ ਕੁਦਰਤ ਨੇ ਇਹਨਾਂ ਨੂੰ ਪ੍ਰਦਾਨ ਕੀਤੀ ਹੋਈ ਹੈ।
ਐਸ ਬੀ ਐਸ ਪੰਜਾਬੀ ਨਾਲ ਗੱਲਬਾਤ ਦੌਰਾਨ ਹੀ ਇਹਨਾਂ ਨੇ ਮੌਕੇ ਤੇ ਹੀ ਕੁੱਝ ਲਾਈਨਾਂ ਲਿਖੀਆਂ ਅਤੇ ਗਾ ਕੇ ਵੀ ਸੁਣਾਈਆਂ।
