ਆਸਟ੍ਰੇਲੀਆ ਵਿੱਚ ਸਥਾਪਤ ਹੋਣ ਦਾ ਸੁਪਨਾ ਲੈ ਕੇ ਆਉਣ ਵਾਲੇ ਪ੍ਰਵਾਸੀਆਂ ਵਿੱਚੋਂ ਬਹੁਤਿਆਂ ਦਾ ਸਟੂਡੈਂਟ ਵੀਜ਼ਾ ਰਿਫਿਊਜ਼ ਹੋਣ ਨਾਲ ਇਹ ਸੁਪਨਾ ਟੁੱਟ ਜਾਂਦਾ ਹੈ। ਤਾਜ਼ਾ ਅੰਕੜਿਆਂ ਅਨੁਸਾਰ, ਰਿਫਿਊਜ਼ ਹੋਏ ਸਟੂਡੈਂਟ ਵੀਜ਼ਿਆਂ ਵਿਰੁੱਧ ART ਵਿੱਚ ਅਪੀਲਾਂ ਦੀ ਗਿਣਤੀ ਰਿਕਾਰਡ ਪੱਧਰ 'ਤੇ ਪਹੁੰਚ ਗਈ ਹੈ। ਇਸ ਪੌਡਕਾਸਟ ਵਿੱਚ ਅਸੀਂ ਮਾਈਗ੍ਰੇਸ਼ਨ ਮਾਹਿਰ ਅਰੁਨ ਬਾਂਸਲ ਨਾਲ ਵੀ ਗੱਲ ਕੀਤੀ, ਜਿਨ੍ਹਾਂ ਨੇ ਵੀਜ਼ਾ ਅਤੇ ਅਪੀਲ ਪ੍ਰਕਿਰਿਆ ਬਾਰੇ ਜਾਣਕਾਰੀ ਸਾਂਝੀ ਕੀਤੀ। ਨਾਲ ਹੀ, ਇੱਕ ਵਿਦਿਆਰਥਣ ਦੀ ਕਹਾਣੀ, ਜੋ ਸਟੂਡੈਂਟ ਵੀਜ਼ਾ ਰੱਦ ਹੋਣ ਤੋਂ ਬਾਅਦ ਅਪੀਲ ਦੇ ਫੈਸਲੇ ਦੀ ਉਡੀਕ ਵਿੱਚ ਹੈ, ਉਸ ਬਾਰੇ ਵੀ ਚਰਚਾ ਕੀਤੀ ਗਈ ਹੈ।
ਆਸਟ੍ਰੇਲੀਆ ਆ ਕੇ ਪੜਨਾ ਅਤੇ ਫਿਰ ਆਸਟ੍ਰੇਲੀਆ ਰਹਿਣ ਦੇ ਸੁਪਨੇ ਨੂੰ ਸਾਕਾਰ ਕਰਨਾ ਹੀ ਇਸ ਵਿਦਿਆਰਥਣ ਦਾ ਮਕਸਦ ਸੀ। ਸੋ ਜੂਨ 2024 ਦੇ ਵਿੱਚ 'ਤਨੀਸ਼ਾ*' (ਅਸਲ ਨਾਮ ਨਹੀਂ) ਟੂਰਿਸਟ ਵੀਜ਼ੇ 'ਤੇ ਆਸਟ੍ਰੇਲੀਆ ਆਈ ਸੀ ਅਤੇ ਫਿਰ ਇੱਥੇ ਪਹੁੰਚ ਕੇ ਉਸਨੇ ਸਟੂਡੈਂਟ ਵੀਜ਼ਾ ਦਾਖਲ ਕੀਤਾ ਤਾਂ ਜੋ ਇੱਥੇ ਆ ਕੇ ਪੜ ਸਕੇ, ਪਰ 10 ਮਹੀਨਿਆਂ ਦੇ ਲੰਮੇ ਇੰਤਜ਼ਾਰ ਤੋਂ ਬਾਅਦ ਤਨੀਸ਼ਾ ਨੂੰ ਉਦੋਂ ਝਟਕਾ ਲੱਗਾ ਜਦੋਂ ਉਸਦਾ ਸਟੂਡੈਂਟ ਵੀਜ਼ਾ ਰਿਫਿਊਜ਼ ਕਰ ਦਿੱਤਾ ਗਿਆ ਸੀ। ਤਨੀਸ਼ਾ ਨੇ ਐਸ ਬੀ ਐਸ ਪੰਜਾਬੀ ਨਾਲ ਗੱਲ ਕਰਦੇ ਹੋਏ ਦੱਸਿਆ ਕਿ ਉਸਦੇ ਸਾਰੇ ਦਸਤਾਵੇਜ਼ ਅਸਲੀ ਸਨ ਅਤੇ ਉਹ ਇੱਕ ਵਿਦਿਆਰਥਣ ਵਜੋਂ ਇੱਥੇ ਪੜਨਾ ਚਾਹੁੰਦੀ ਸੀ।
ਤਨੀਸ਼ਾ ਨੇ ਐਸ ਬੀ ਪੰਜਾਬੀ ਨੂੰ ਦੱਸਿਆ, "ਮੈਂ ਜੂਨ 2024 'ਚ ਟੂਰਿਸਟ ਵੀਜ਼ੇ 'ਤੇ ਆਸਟ੍ਰੇਲੀਆ ਆਈ ਸੀ ਅਤੇ ਉਸ ਵਕਤ ਮੈਂ ਸਟੂਡੈਂਟ ਵੀਜ਼ੇ ਲਈ ਅਰਜ਼ੀ ਦੇ ਦਿੱਤੀ ਸੀ ਪਰ ਵੀਜ਼ਾ ਰਿਜੈਕਟ ਹੋ ਗਿਆ। ਰਿਫਿਊਜ਼ਲ ਦੇ ਵਿੱਚ ਕਿਹਾ ਗਿਆ ਕਿ ਮੇਰਾ ਮਕਸਦ ਪੜਨਾ ਨਹੀਂ ਹੈ, ਜਦਕਿ ਮੇਰੇ ਸਾਰੇ ਦਸਤਾਵੇਜ਼ ਅਸਲੀ ਸਨ ਪਰ ਵੀਜ਼ਾ ਅਫਸਰ ਨੂੰ ਅਜਿਹਾ ਨਹੀਂ ਲੱਗਿਆ। ਮੈਨੂੰ ਲੱਗ ਰਿਹਾ ਸੀ ਕਿ ਵੀਜ਼ਾ ਤਾਂ ਆ ਹੀ ਜਾਵੇਗਾ।"
ਸਟੂਡੈਂਟ ਵੀਜ਼ੇ ਰਿਜੈਕਟ ਕਿਉਂ ਹੋ ਰਹੇ ਹਨ?
ਤਨੀਸ਼ਾ ਸਿਰਫ ਇਕੱਲੀ ਨਹੀਂ ਹੈ ਜਿਸਦਾ ਪਿਛਲੇ ਦਿਨਾਂ 'ਚ ਸਟੂਡੈਂਟ ਵੀਜ਼ਾ ਰਿਜੈਕਟ ਕੀਤਾ ਗਿਆ ਹੈ। ਪਿਛਲੇ ਇੱਕ ਸਾਲ ਤੋਂ ਇਹ ਵੀਜ਼ੇ ਰਿਫਿਊਜ਼ ਹੋਣ ਦੀ ਦਰ ਕਾਫੀ ਵੱਧ ਚੁੱਕੀ ਹੈ। ਮਾਈਗ੍ਰੇਸ਼ਨ ਮਾਹਿਰ ਅਰੁਣ ਬਾਂਸਲ ਨੇ ਸਾਡੇ ਨਾਲ ਗੱਲਬਾਤ ਕਰਦੇ ਹੋਏ ਦੱਸਿਆ ਕਿ ਪਿਛਲੇ ਕੁਝ ਸਮੇਂ ਤੋਂ ਵੱਡੀ ਮਾਤਰਾ ‘ਚ ਸਟੱਡੀ ਵੀਜੇ ਰਿਜੈਕਟ ਹੋਣ ਦੀ ਵਜਾ, ਸਰਕਾਰ ਵੱਲੋਂ ਨੈੱਟ ਮਾਈਗ੍ਰੇਸ਼ਨ ਨੂੰ ਘਟਾਉਣ ਦੀ ਨੀਤੀ ਹੈ।
ART ਦੇ ਤਾਜ਼ਾ ਅੰਕੜੇ ਕੀ ਦੱਸਦੇ ਹਨ?
ਸਟੂਡੈਂਟ ਵੀਜਾ ਰਿਜੈਕਟ ਹੋਣ ਦੀ ਦਰ ਵਧਣ ਦੇ ਨਾਲ ਇਸ ਫੈਸਲੇ ਦੇ ਵਿਰੁੱਧ ਭਾਰੀ ਮਾਤਰਾ ‘ਚ ਐਪਲੀਕੈਂਟਸ ਹੁਣ ART ਅਪੀਲ ਵੀ ਪਾ ਰਹੇ ਹਨ। Administrative Tribunal Appeal ਦੇ ਤਾਜ਼ਾ ਅੰਕੜੇ ਦੱਸਦੇ ਨੇ ਕਿ ਅਕਤੂਬਰ 2024 ਤੋਂ ਮਾਰਚ 2025 ਤੱਕ ਦੇ 6 ਮਹੀਨਿਆਂ ਦੌਰਾਨ ਕੁੱਲ 37,814 ਅਪੀਲਾਂ ਦਾਇਰ ਕੀਤੀਆਂ ਗਈਆਂ ਨੇ ਜਿਨ੍ਹਾਂ ਵਿੱਚੋਂ ਸਭ ਤੋਂ ਵੱਧ 13,640 ਅਪੀਲਾਂ ਸਟੂਡੈਂਟ ਵੀਜਾਂ ਨਾਲ ਹੀ ਸੰਬੰਧਿਤ ਸਨ।
'ਤਨੀਸ਼ਾ' ਨੇ ਵੀ ਇਸ ਹੀ ਉਮੀਦ ਵਿੱਚ ਹੁਣ ART 'ਚ ਅਪੀਲ ਦਾਇਰ ਕੀਤੀ ਹੈ ਕਿ ਸ਼ਾਇਦ ਸਟੂਡੈਂਟ ਵੀਜ਼ੇ ਦੇ ਫੈਸਲੇ ਦੇ ਉਲਟ ਉਹ ਅਪੀਲ ਜਿੱਤ ਜਾਵੇ ਅਤੇ ਉਸਨੂੰ ਸਟੂਡੈਂਟ ਵੀਜ਼ਾ ਮਿਲ ਜਾਵੇ।
ਪਰ ਤਨਿਸ਼ਾ ਕਹਿੰਦੀ ਹੈ, "ਇਸ ਸਮੇਂ ਮੈਨੂੰ ਕੁਝ ਸਮਝ ਨਹੀਂ ਆ ਰਿਹਾ, ਕਿਉਂਕਿ ਪਹਿਲਾਂ ਵੀ ਜੋ ਸੋਚਿਆ ਸੀ ਉਹ ਗਲਤ ਸਾਬਿਤ ਹੋਇਆ ਅਤੇ ਹੁਣ ਪਤਾ ਨਹੀਂ ਕੀ ਹੋਵੇਗਾ ਪਰ ਮੈਂ ਆਪਣੇ ਵੱਲੋਂ ਪੂਰੀ ਕੋਸ਼ਿਸ਼ ਕਰ ਰਹੀ ਹਾਂ।"
ART ਅਪੀਲ ਦੇ ਪਾਜ਼ੀਟਿਵ ਫੈਸਲੇ ਲਈ ਕੀ ਕੀਤਾ ਜਾਵੇ?
"ਡਿਪਾਰਟਮੈਂਟ ਨੂੰ ਜੇ ਲੱਗਦਾ ਹੈ ਕਿ ਤੁਸੀਂ ਅਸਲੀ ਵਿਦਿਆਰਥੀ ਨਹੀਂ ਹੋ ਤਾਂ ਹੀ ਤੁਹਾਡਾ ਵੀਜ਼ਾ ਰਿਜੈਕਟ ਕੀਤਾ ਜਾਂਦਾ ਹੈ ਅਤੇ ਜੇ ART 'ਚ ਅਪੀਲ ਪਾ ਕੇ ਤੁਸੀਂ ਫਿਰ ਪੜਾਈ ਨਹੀਂ ਕਰਦੇ ਤਾਂ ਜ਼ਿਆਦਾ ਉਮੀਦ ਹੈ ਕਿ ART ਦਾ ਵੀ ਫੈਸਲਾ ਤੁਹਾਡੇ ਹੱਕ 'ਚ ਨਹੀਂ ਆਵੇਗਾ। ਇਸ ਤੋਂ ਇਲਾਵਾ ਤੁਹਾਨੂੰ ਆਪਣੇ ਆਈਲੈੱਟਸ ਅਤੇ ਪੀ.ਟੀ.ਈ ਦੇ ਸਕੋਰ ਵੀ ਸਹੀ ਅਤੇ ਵੈਧ ਰੱਖਣੇ ਹੋਣਗੇ", ਅਰੁਨ ਬਾਂਸਲ ਨੇ ਐਸ ਬੀ ਐਸ ਪੰਜਾਬੀ ਨੂੰ ਦੱਸਿਆ।
ART 'ਚ ਅਪੀਲ ਦਾਇਰ ਕਰਨ ਦੀ ਫੀਸ ਕਿੰਨੀ ਹੈ?
ਇਸ ਸਮੇਂ ਏ.ਆਰ.ਟੀ ਯਾਨੀ Administrative Review Tribunal 'ਚ ਵੀਜ਼ਿਆਂ ਸੰਬੰਧਿਤ ਮਾਮਲਿਆਂ ਦੀ ਅਪੀਲ ਲਈ ਫੀਸ $3496 ਡਾਲਰ ਹੈ। ਜੇ ਬਿਨੇਕਾਰ ART 'ਚ ਅਪੀਲ ਜਿੱਤ ਜਾਂਦਾ ਹੈ ਤਾਂ ਉਸ ਵੱਲੋਂ ਅਰਜ਼ੀ ਦੇਣ ਵੇਲੇ ਭਰੀ ਫੀਸ ਦੇ ਵਿੱਚੋਂ 50% ਫੀਸ ਰਿਫੰਡ ਹੋ ਜਾਂਦੀ ਹੈ। ਪਰ 'ਸਟੂਡੈਂਟ ਵੀਜ਼ਾ' ਰਿਜੈਕਟ ਹੋਣ, ਵਾਪਸ ਲਏ ਜਾਣ ਜਾਂ ਫੇਰ ਸਫਲ ਹੋਣ ਦੀ ਸੂਰਤ 'ਚ ਅਜਿਹਾ ਕੁਝ ਨਹੀਂ ਹੁੰਦਾ।
ਵਧੇਰੇ ਜਾਣਕਾਰੀ ਲਈ ਸੁਣੋ ਇਹ ਪੌਡਕਾਸਟ..
🔊 ਸਾਡੇ ਸਾਰੇ ਪੌਡਕਾਸਟ ਇਸ ਲਿੰਕ ਰਾਹੀਂ ਸੁਣੇ ਜਾ ਸਕਦੇ ਹਨ।
📢 ਐਸ ਬੀ ਐਸ ਪੰਜਾਬੀ ਦੁਨੀਆ ਭਰ ਦੀਆਂ ਤਾਜ਼ਾ-ਤਰੀਨ ਖ਼ਬਰਾਂ ਸਮੇਤ ਉਨ੍ਹਾਂ ਕਹਾਣੀਆਂ ਨਾਲ ਜੋੜਦਾ ਹੈ ਜੋ ਆਸਟ੍ਰੇਲੀਆ ਵਿਚਲੇ ਜੀਵਨ ਅਤੇ ਪੰਜਾਬੀ ਬੋਲਣ ਵਾਲੇ ਆਸਟ੍ਰੇਲੀਅਨ ਭਾਈਚਾਰੇ ਲਈ ਅਹਿਮ ਹਨ।
💻 ਸਾਡਾ ਲਾਈਵ ਪ੍ਰੋਗਰਾਮ ਤੁਸੀਂ ਸੋਮਵਾਰ ਤੋਂ ਸ਼ੁੱਕਰਵਾਰ ਸ਼ਾਮ 4 ਵਜੇ SBS ਸਾਊਥ ਏਸ਼ੀਅਨ ਦੇ ਡਿਜੀਟਲ ਰੇਡੀਓ ਉੱਤੇ, ਆਪਣੇ ਟੈਲੀਵਿਜ਼ਨ 'ਤੇ ਚੈਨਲ 305 ਉੱਤੇ, SBS ਆਡੀਓ ਐਪ ਜਾਂ ਸਟ੍ਰੀਮ ਰਾਹੀਂ ਸੁਣ ਸਕਦੇ ਹੋ।
📲 ਹੋਰ ਜਾਣਕਾਰੀ ਲਈ ਸਾਨੂੰ ਵੈਬਸਾਈਟ, ਫੇਸਬੁੱਕ ਅਤੇ ਇੰਸਟਾਗ੍ਰਾਮ 'ਤੇ ਫਾਲੋ ਕਰੋ।
