ਮੈਲਬੌਰਨ ਤੋਂ ਭੰਗੜਾ ਕੋਚ ਮਨਜਿੰਦਰ ਸਿੰਘ, ਜੋ ਪਿਛਲੇ ਇੱਕ ਦਹਾਕੇ ਤੋਂ ਆਸਟ੍ਰੇਲੀਆ ਵਿੱਚ ਬੱਚਿਆਂ ਨੂੰ ਭੰਗੜਾ ਸਿਖਾ ਰਹੇ ਹਨ, ਦਾ ਮੰਨਣਾ ਹੈ ਕਿ ਬੱਚਿਆਂ ਨੂੰ ਹਿਪ-ਹੋਪ ਦੇ ਨਾਲ-ਨਾਲ ਲੋਕ ਵਿਰਸੇ ਵਿੱਚੋਂ ਉਪਜੇ ਭੰਗੜੇ ਦੇ ਰੂਪਾਂ ਜਿਵੇਂ ਕਿ ਝੂਮਰ ਆਦਿ ਤੋਂ ਵੀ ਵਾਕਿਫ ਕਰਵਾਉਣਾ ਚਾਹੀਦਾ ਹੈ।
2008 ਵਿੱਚ ਪੰਜਾਬ ਤੋਂ ਪਰਵਾਸ ਕਰਕੇ ਆਸਟ੍ਰੇਲੀਆ ਆਏ ਮਨਜਿੰਦਰ ਸਿੰਘ ਸ਼ੁਰੂ ਤੋਂ ਹੀ ਪੰਜਾਬੀ ਲੋਕ ਨਾਚ ਭੰਗੜੇ ਨਾਲ਼ ਜੁੜੇ ਹੋਏ ਹਨ।
ਉਹ ਇੱਕ ਭੰਗੜਾ ਕੋਚ ਵਜੋਂ ਆਸਟ੍ਰੇਲੀਆ ਦੇ 'ਰੂਹ ਪੰਜਾਬ ਦੀ' ਗਰੁੱਪ ਨਾਲ ਜਿਥੇ ਲੰਬੇ ਸਮੇਂ ਤੋਂ ਸਾਂਝ ਰੱਖਦੇ ਹਨ ਓਥੇ ਉਹ ਸਿਡਨੀ ਤੋਂ ਸ਼ੁਰੂ ਹੋਏ ਇਸ ਗਰੁੱਪ ਦੇ ਮੈਲਬੌਰਨ ਵਿਚਲੇ ਚੈਪਟਰ ਦੇ ਕਰਤਾ-ਧਰਤਾ ਹਨ ਅਤੇ ਬੱਚਿਆਂ ਨੂੰ ਭੰਗੜੇ ਨਾਲ਼ ਜੋੜੀ ਰੱਖਣ ਤੇ ਸਿਖਲਾਈ ਦੇਣ ਲਈ ਨਿਰੰਤਰ ਯਤਨਸ਼ੀਲ ਹਨ।
ਉਨ੍ਹਾਂ ਭੰਗੜੇ ਨੂੰ ਮਹਿਜ਼ ਇੱਕ ਕਲਾ ਦੀ ਬਜਾਏ ਪੰਜਾਬੀ ਸੱਭਿਆਚਾਰ ਦੀ ਅਦੁੱਤੀ ਪਹਿਚਾਣ ਤੇ ਅਨਿੱਖੜਵਾਂ ਅੰਗ ਦੱਸਿਆ।
ਅੱਜ ਦੇ ਦੌਰ ਵਿੱਚ ਜਿਥੇ ਜੋਸ਼ ਨਾਲ ਭਰਪੂਰ ਇਸ ਲੋਕ ਨਾਚ ਨੇ ਦੁਨੀਆ ਭਰ ਵਿੱਚ ਆਪਣੀ ਪਹਿਚਾਣ ਬਣਾਈ ਹੈ ਓਥੇ ਉਨ੍ਹਾਂ ਦਾ ਮੰਨਣਾ ਹੈ ਕਿ ਲੋਕ ਹੁਣ ਇਸ ਦੇ ਅਸਲ ਰੰਗ ਤੋਂ ਦੂਰ ਹੁੰਦੇ ਜਾ ਰਹੇ ਹਨ।
ਉਨ੍ਹਾਂ ਕਿਹਾ, "ਸਮੇਂ ਦੇ ਨਾਲ-ਨਾਲ ਅਸੀਂ ਭੰਗੜੇ ਦੀਆਂ ਵੱਖੋ-ਵੱਖਰੀਆਂ ਕਿਸਮ ਵੱਲ ਅੱਗੇ ਵਧਦੇ ਜਾ ਰਹੇ ਹਾਂ। ਅੱਜ ਜਿਥੇ ਭੰਗੜੇ ਦੇ ਹਿਪ-ਹੋਪ ਰੂਪ ਨੂੰ ਦੁਨੀਆ ਭਰ ਦੀਆਂ ਸਟੇਜਾਂ ਦੇ ਉੱਤੇ ਦੇਖਿਆ ਜਾ ਸਕਦਾ ਹੈ ਓਥੇ ਹੀ ਇਸ ਦਾ ਅਸਲ ਰੂਪ ਭਾਵ ਫੋਕ ਭੰਗੜਾ ਦਿਨੋਂ-ਦਿਨੀ ਲੁਪਤ ਹੁੰਦਾ ਜਾ ਰਿਹਾ ਹੈ।"
ਮਨਜਿੰਦਰ ਸਿੰਘ ਨੇ ਕਿਹਾ ਕਿ ਉਹ ਭੰਗੜੇ ਦੇ ਹਰ ਰੂਪ ਨੂੰ ਪਸੰਦ ਕਰਦੇ ਹਨ ਪਰ ਉਹ ਚਾਹੁੰਦੇ ਹਨ ਕਿ ਇਸਦੇ ਮੂਲ ਰੂਪਾਂ ਨੂੰ ਵੀ ਓਨੀਂ ਹੀ ਤਵੱਜੋਂ ਦਿੱਤੀ ਜਾਣੀ ਚਾਹੀਦੀ ਹੈ।
"ਭੰਗੜਾ ਸਾਡੇ ਸੱਭਿਆਚਾਰ ਦੀ ਪਹਿਚਾਣ ਹੈ ਕਿਓਂਕਿ ਇਹ ਸਿਰਫ ਇੱਕ ਨਾਚ ਹੀ ਨਹੀਂ ਸਗੋਂ ਸਾਡੇ ਲੋਕ ਸਾਜ਼ਾਂ, ਬੋਲੀਆਂ ਜ਼ਰੀਏ ਸਾਡੇ ਜਜ਼ਬਾਤਾਂ ਨੂੰ ਵੀ ਪਰਿਭਾਸ਼ਿਤ ਕਰਦਾ ਹੈ," ਉਨ੍ਹਾਂ ਕਿਹਾ।
