ਆਪਣੇ ਸਫ਼ਰ ਦੀ ਸ਼ੁਰੂਆਤ ਬਾਰੇ ਦੱਸਦੇ ਸਮੇਂ ਰੂਪਨ ਨੇ ਯੂਨੀਵਰਸਿਟੀ ਵਿੱਚ ਜਸਮੀਤ ਸਿੰਘ ਰੈਣਾ (JusReign) ਨਾਲ ਮੁਲਾਕਾਤ ਦਾ ਜ਼ਿਕਰ ਕੀਤਾ ਜਿਸ ਤੋਂ ਬਾਅਦ ਉਨ੍ਹਾਂ ਦੇ YouTube ਉੱਤੇ ਪੰਜਾਬੀ ਸਕਿੱਟਾਂ ਬਣਾਉਣ ਦੇ ਸਿਲਸਿਲੇ ਦੀ ਸ਼ੁਰੂਆਤ ਹੋਈ।
‘YouTube ਬਾਰੇ ਉਸ ਵੇਲੇ ਕਿਸੇ ਨੂੰ ਪਤਾ ਨਹੀਂ ਸੀ ਜਦੋ ਮੈਂ ਤੇ ਜਸਮੀਤ ਨੇ ਮਿਲ ਕੇ ਸਕਿੱਟਾਂ ਬਣਾਈਆਂ, ਕਦੇ ਪੰਜਾਬੀ ਮੰਮੀ ਬਣ ਗਏ ਤੇ ਕਦੇ ਡੈਡੀ। ਉਹ ਸਕਿੱਟਾਂ ਕੈਨੇਡਾ, ਦਿੱਲੀ, ਆਸਟ੍ਰੇਲੀਆ ਸਮੇਤ ਹਰ ਪਾਸੇ ਲੋਕਾਂ ਵਲੋਂ ਦੇਖੀਆਂ ਗਈਆਂ,’ ਰੂਪਨ ਨੇ ਦੱਸਿਆ।
ਇਸ ਤੋਂ ਬਾਅਦ ਰੂਪਨ ਨੇ ਪੰਜਾਬੀ ਗਾਣਿਆਂ ਦੇ ਵੀਡੀਉ ਡਾਇਰੈਕਟਰ ਬਣਨ ਵੱਲ ਕਦਮ ਪੁੱਟਿਆ ਜਿੱਥੇ ਪੰਜਾਬੀ ਗਾਇਕ ਮਿੱਕੀ ਸਿੰਘ ਅਤੇ ਪ੍ਰੋਫੈਸੀ (PropheC) ਨਾਲ ਆਗਾਜ਼ ਕੀਤਾ।।
YouTube ਦੀਆਂ ਸਕਿੱਟਾਂ ਤੋਂ ਮਿਊਜ਼ਿਕ ਵੀਡੀਉ ਬਣਾਉਣਾ ਬਹੁਤ ਔਖਾ ਸੀ। ਜਿਥੇ ਲੋਕ ਤੁਹਾਨੂੰ ਕਾਮੇਡੀ ਤੋਂ ਜਾਣਦੇ ਹੋਣ ਤਾਂ ਤੁਹਾਨੂੰ ਡਾਇਰੈਕਟਰ ਪ੍ਰਵਾਨ ਕਰਨਾ ਮੁਸ਼ਕਿਲ ਹੋ ਜਾਂਦਾ ਹੈ ਇਸ ਕਰ ਕੇ ਲੋਕਾਂ ਨੂੰ ਸਮਝੌਣਾ ਸੌਖਾ ਨਹੀਂ ਸੀ।ਰੂਪਨ ਬੱਲ
ਰੂਪਨ ਨੇ ਅੱਗੇ ਦੱਸਿਆ ਕਿ ਹੌਲੀਵੁੱਡ ਦੀਆਂ ਫ਼ਿਲਮਾਂ, ਕੰਮ ਕਰਨ ਦੇ ਤਰੀਕੇ ਤੇ ਨਵੇਂ ਕਲਾਕਾਰੀ ਦੇ ਮਾਧਿਅਮ ਉਸ ਨੂੰ ਪ੍ਰੇਰਿਤ ਕਰਦੇ ਹਨ ਅਤੇ ਇਸੇ ਪ੍ਰੇਰਨਾ ਨਾਲ ਹੀ ਉਹ ਪੰਜਾਬੀ ਫ਼ਿਲਮਾਂ ਨੂੰ ‘ਹੌਲੀਵੁੱਡ ਪੱਧਰ’ ਤੱਕ ਪਹੁੰਚਾਉਣ ਦੇ ਸੁਪਨੇ ਨਾਲ ਕੰਮ ਕਰ ਰਿਹਾ ਹੈ।
ਮੈਂ ਹੌਲੀਵੁੱਡ ਸਿਨੇਮਾ ਨੂੰ ਪੰਜਾਬੀ ਵਿੱਚ ਲੈ ਕੇ ਆ ਰਿਹਾ ਹਾਂ। ਮੈਨੂੰ ਜੋ ਕਮੀਆਂ ਪੰਜਾਬੀ ਸਿਨੇਮਾ ਵਿੱਚ ਲੱਗੀਆਂ ਉਸ ਨੂੰ ਪੂਰੀਆਂ ਕਰ ਕੇ, ਹੌਲੀਵੁਡ ਨੂੰ ਪੰਜਾਬ ਨਾਲ ਮਿਲਾ ਕੇ ਇਕ ਫਿਊਜ਼ਨ ਬਣਾ ਰਿਹਾ ਹਾਂ।ਰੂਪਨ ਬੱਲ
ਪੰਜਾਬੀ ਸੰਗੀਤ ਦੇ ਸਿਤਾਰੇ ਕਰਨ ਔਜਲਾ, ਗੁਰੂ ਰੰਧਾਵਾ ਅਤੇ ਹੋਰ ਗਾਇਕਾਂ ਨਾਲ ਹਿੱਟ ਗੀਤ ਬਣਾਉਣ ਤੋਂ ਬਾਅਦ ਹੁਣ ਇਹ ਨੌਜਵਾਨ ਪੰਜਾਬੀ ਫ਼ਿਲਮ ‘ਇਹਨਾਂ ਨੂੰ ਰਹਿਣਾ ਸਹਿਣਾ ਨਹੀਂ ਆਉਂਦਾ’ ਨਾਲ ਪੰਜਾਬੀ ਫ਼ਿਲਮਾਂ ਵਿੱਚ ਨਿਰਦੇਸ਼ਕ ਵਜੋਂ ਸ਼ੁਰੂਆਤ ਕਰ ਰਿਹਾ ਹੈ।
ਇਹ ਕਹਾਣੀ ਕੈਨੇਡਾ ਦੇ ਪੰਜਾਬੀ ਨਾਗਰਿਕ ਅਤੇ ਉੱਥੇ ਆਏ ਅੰਤਰਾਸ਼ਟਰੀ ਵਿਦਿਆਰਥੀਆਂ ਦੀ ਦਾਸਤਾਨ ਹੈ।
‘ਇਹ ਫਿਲਮ ਕੈਨੇਡਾ ਵਿੱਚ ‘ਕੱਚੇ ਤੇ ਪੱਕੇ’ ਪੰਜਾਬੀਆਂ ਦੇ ਆਪਸੀ ਮਤਭੇਦ ਦਰਸਾਉਂਦੀ ਹੈ। ਪੰਜਾਬ ਵਿੱਚ ਤਾਂ ਅਸੀਂ ਵੰਡੇ ਹੀ ਪਾਏ ਹਾਂ ਧਰਮ ਜਾਂ ਜ਼ਾਤ ਦੇ ਨਾਮ ‘ਤੇ, ਪਰ ਜੇਕਰ ਕੈਨੇਡਾ ਜਾ ਕੇ ਵੀ ਅਸੀਂ ਇੱਕ-ਦੂਜੇ ਨੂੰ ਵੰਡਣਾ ਹੀ ਹੈ ਤਾਂ ਫਿਰ ਫਾਇਦਾ ਕੀ ਹੋਇਆ,” ਰੂਪਨ ਨੇ ਇਸ ਫ਼ਿਲਮ ਦੀ ਕਹਾਣੀ ਬਾਰੇ ਦੱਸਦਿਆਂ ਕਿਹਾ।
ਫਿਲਮ ਬਾਰੇ ਹੋਰ ਗੱਲ ਕਰਦਿਆਂ ਰੂਪਨ ਨੇ ਦੱਸਿਆ ਕਿ ਇਸ ਫਿਲਮ ਨੂੰ ਬਣਾਉਣ ਵਾਲੇ 60% ਲੋਕ ਅੰਤਰਾਸ਼ਟਰੀ ਵਿਦਿਆਰਥੀ ਸਨ ਅਤੇ ਸਥਾਨਕ ਕਲਾਕਾਰਾਂ ਨੂੰ ਵੀ ਕੰਮ ਕਰਨ ਦਾ ਮੌਕਾ ਮਿਲਿਆ। ਰੂਪਨ ਦੀ ਟੀਮ ਵਿੱਚ ਮੈਲਬੌਰਨ ਤੋਂ ‘ਦਿਲਪ੍ਰੀਤ ਵੀ ਐਫ ਐਕਸ’ ਨੇ ਵੀ ਆਪਣਾ ਯੋਗਦਾਨ ਪਾਇਆ ਹੈ।
ਰੂਪਨ ਦਾ ਆਪਣੀ ਕਲਾਕਾਰੀ ਨੂੰ ਲੈ ਕੇ ਜਜ਼ਬਾ, ਇਸ ਫ਼ਿਲਮ ਨੂੰ ਬਣਾਉਣ ਪਿੱਛੇ ਕਹਾਣੀਆਂ ਅਤੇ ਹੋਰ ਪਹਿਲੂਆਂ ਬਾਰੇ ਜਾਣਨ ਲਈ ਸੁਣੋ ਇਹ ਪੌਡਕਾਸਟ।
ਸਾਡੇ ਸਾਰੇ ਪੌਡਕਾਸਟ ਇਸ ਲਿੰਕ ਰਾਹੀਂ ਸੁਣੇ ਜਾ ਸਕਦੇ ਹਨ।
📢 ਐਸ ਬੀ ਐਸ ਪੰਜਾਬੀ ਦੁਨੀਆ ਭਰ ਦੀਆਂ ਤਾਜ਼ਾ-ਤਰੀਨ ਖ਼ਬਰਾਂ ਸਮੇਤ ਉਨ੍ਹਾਂ ਕਹਾਣੀਆਂ ਨਾਲ ਜੋੜਦਾ ਹੈ ਜੋ ਆਸਟ੍ਰੇਲੀਆ ਵਿਚਲੇ ਜੀਵਨ ਅਤੇ ਪੰਜਾਬੀ ਬੋਲਣ ਵਾਲੇ ਆਸਟ੍ਰੇਲੀਅਨ ਭਾਈਚਾਰੇ ਲਈ ਅਹਿਮ ਹਨ।
💻 ਸਾਡਾ ਲਾਈਵ ਪ੍ਰੋਗਰਾਮ ਤੁਸੀਂ ਸੋਮਵਾਰ ਤੋਂ ਸ਼ੁੱਕਰਵਾਰ ਸ਼ਾਮ 4 ਵਜੇ SBS ਸਾਊਥ ਏਸ਼ੀਅਨ ਦੇ ਡਿਜੀਟਲ ਰੇਡੀਓ ਉੱਤੇ, ਆਪਣੇ ਟੈਲੀਵਿਜ਼ਨ 'ਤੇ ਚੈਨਲ 305 ਉੱਤੇ, SBS ਆਡੀਓ ਐਪ ਜਾਂ ਸਟ੍ਰੀਮ ਰਾਹੀਂ ਸੁਣ ਸਕਦੇ ਹੋ।
📲 ਹੋਰ ਜਾਣਕਾਰੀ ਲਈ ਸਾਨੂੰ ਵੈਬਸਾਈਟ, ਫੇਸਬੁੱਕ ਅਤੇ ਇੰਸਟਾਗ੍ਰਾਮ 'ਤੇ ਫਾਲੋ ਕਰੋ।
