ਫੈਡਰਲ ਸਰਕਾਰ ਵਲੋਂ ਵਰਕਿੰਗ ਹੋਲੀਡੇ ਵੀਜ਼ਾ ਤਹਿਤ ਕੀਤੇ ਬਦਲਾਵਾਂ ਨਾਲ ਬੁਸ਼ਫਾਇਰ ਤੋਂ ਪ੍ਰਭਾਵਤ ਭਾਈਚਾਰੇ ਨੂੰ ਮੁੜ ਤੋਂ ਆਪਣੇ ਆਪ ਨੂੰ ਸਥਾਪਿਤ ਕਰਨ ਦਾ ਮੌਕਾ ਮਿਲ ਸਕਦਾ ਹੈ।
ਮੌਜੂਦਾ ਪ੍ਰਣਾਲੀ ਤਹਿਤ ਇਸ ਵੀਜ਼ਾ ਕੈਟੀਗਰੀ ਤਹਿਤ ਆਉਣ ਵਾਲੇ 18 ਤੋਂ 30 ਸਾਲਾਂ ਦੇ ਵਿਅਕਤੀ ਇੱਕ ਸਾਲ ਲਈ ਆਸਟ੍ਰੇਲੀਆ ਰਹਿ ਸਕਦੇ ਹਨ ਅਤੇ ਕਿਸੇ ਵੀ ਇੱਕ ਰੁਜ਼ਗਾਰਦਾਤਾ ਕੋਲ਼ ਜ਼ਿਆਦਾ ਤੋਂ ਜ਼ਿਆਦਾ ਛੇ ਮਹੀਨਿਆਂ ਲਈ ਹੀ ਕੰਮ ਕਰ ਸਕਦੇ ਹਨ। ਇੱਕ ਵਲੰਟੀਅਰ ਵਜੋਂ ਕੀਤਾ ਗਿਆ ਇਸ ਕੰਮ ਵਿੱਚ ਨਹੀਂ ਗਿਣਿਆ ਜਾਂਦਾ।
ਆਪਣਾ ਦੂਜਾ ਸਾਲ ਆਸਟ੍ਰੇਲੀਆ ਚ ਬਿਤਾਉਣ ਲਈ ਇਹਨਾਂ ਬੈਕਪੈਕਰਾਂ ਨੂੰ 88 ਦਿਨਾਂ ਲਈ ਖੇਤਰੀ ਆਸਟ੍ਰੇਲੀਆ ਵਿੱਚ ਕੰਮ ਕਰਨ ਦੀ ਲੋੜ ਹੁੰਦੀ ਹੈ ਅਤੇ ਅਗਰ ਉਹ ਤੀਜਾ ਸਾਲ ਵੀ ਇੱਥੇ ਬਿਤਾਉਣਾ ਚਾਹੁਣ ਤਾਂ ਉਹਨਾਂ ਨੂੰ ਛੇ ਮਹੀਨੇ ਹੋਰ ਕੰਮ ਕਰਨਾ ਪੈਂਦਾ ਹੈ।
ਕਾਰਜਕਾਰੀ ਪ੍ਰਵਾਸ ਮੰਤਰੀ ਐਲਨ ਟੱਜ ਅਨੁਸਾਰ ਇਹ ਛੇ ਮਹੀਨਿਆਂ ਵਾਲੀ ਬੰਦਿਸ਼ ਹੁਣ ਬੁਸ਼-ਫਾਇਰ ਨਾਲ਼ ਪ੍ਰਭਾਵਿਤ ਖੇਤਰਾਂ ਉੱਤੇ ਲਾਗੂ ਨਹੀਂ ਹੋਵੇਗੀ।
ਕੀਤੀ ਦੂਜੀ ਵੱਡੀ ਤਬਦੀਲੀ ਤਹਿਤ ਇੱਕ ਵਲੰਟੀਅਰ ਵਜੋਂ ਕੀਤਾ ਗਿਆ ਕੰਮ ਵੀ ਹੁਣ ਵੀਜ਼ੇ ਨੂੰ ਅੱਗੇ ਵਧਾਉਣ ਲਈ ਗਿਣਿਆ ਜਾ ਸਕਦਾ ਹੈ।
ਲ਼ੇਬਰ ਪਾਰਟੀ ਦੇ ਖ਼ਜ਼ਾਨਾ-ਮਸਲਿਆਂ ਦੇ ਬੁਲਾਰੇ ਜਿਮ ਚਾਮਰਸ ਦਾ ਕਹਿਣਾ ਹੈ ਕਿ ਉਹਨਾਂ ਦੀ ਪਾਰਟੀ ਨੇ ਕਈ ਹਫਤੇ ਪਹਿਲਾਂ ਹੀ ਇਹਨਾਂ ਤਬਦੀਲੀਆਂ ਦੀ ਮੰਗ ਕਰ ਦਿੱਤੀ ਸੀ।
ਪਰ ਟਰੇਡ ਯੂਨਿਅਨਾਂ ਇਹਨਾਂ ਬਦਲਾਵਾਂ ਕਾਰਨ ਕੁੱਝ ਚਿੰਤਾ ਵਿੱਚ ਹਨ - ਆਸਟ੍ਰੇਲੀਅਨ ਕੌਂਸਿਲ ਆਫ ਟਰੇਡ ਯੂਨਿਅਨਜ਼ ਨੇ ਪਹਿਲਾਂ ਵੀ ਧਿਆਨ ਵਿੱਚ ਲਿਆਂਦਾ ਸੀ ਕਿ ਇਹਨਾਂ ਵੀਜ਼ਿਆਂ ਦੇ ਚਲਦਿਆਂ ਕਈ ਰੁਜ਼ਗਾਰਦਾਤਾਵਾਂ ਵਲੋਂ ਅਕਸਰ ਬੈਕਪੈਕਰਜ਼ ਦਾ ਸ਼ੋਸ਼ਣ ਕੀਤਾ ਜਾਂਦਾ ਹੈ।
ਜਾਰੀ ਕੀਤੀ ਸਟੇਟਮੈਂਟ ਵਿੱਚ ਇਸ ਸੰਸਥਾ ਨੇ ਕਿਹਾ ਹੈ ਕਿ ਉਹ ਬੁਸ਼-ਫਾਇਰ ਰਿਕਵਰੀ ਪ੍ਰੋਗਰਾਮਾਂ ਦਾ ਸਵਾਗਤ ਕਰਦੇ ਹਨ ਪਰ ਇਸ ਕੰਮ ਲਈ ਆਸਟ੍ਰੇਲੀਆ ਵਿੱਚ ਮੌਜੂਦ ਕਾਮਿਆਂ ਨੂੰ ਹੀ ਹੋਰ ਸਹੂਲਤਾਂ ਦੇ ਕੇ ਕੰਮ ਦਿੱਤਾ ਜਾਣਾ ਚਾਹੀਦਾ ਹੈ ਨਾ ਕਿ ਵਲੰਟੀਅਰਾਂ ਨੂੰ - ਖਾਸ ਕਰ ਓਦੋਂ ਜਦੋਂ ਖੇਤਰੀ ਇਲਾਕੇ ਪਹਿਲਾਂ ਤੋਂ ਹੀ ਬੇਰੁਜ਼ਗਾਰੀ ਨਾਲ਼ ਜੂਝ ਰਹੇ ਹਨ।
ਪੂਰੀ ਜਾਣਕਾਰੀ ਲਈ ਉੱਪਰ ਦਿੱਤੀ ਆਡੀਓ ਰਿਪੋਰਟ ਸੁਣੋ।
Listen to SBS Punjabi Monday to Friday at 9 pm. Follow us on Facebook and Twitter.
