ਮੈਲਬੌਰਨ ਦਾ ਰਹਿਣ ਵਾਲਾ ਬਾਗੀ ਭੰਗੂ ਆਪਣੀ ਸੁਚੱਜੀ ਗਾਇਕੀ ਤੇ ਆਪਣੇ ਮਿਲਾਪੜੇ ਸੁਭਾਅ ਕਾਰਨ ਲੋਕਾਂ ਦੇ ਦਿਲਾਂ ਵਿੱਚ ਆਪਣੀ ਛਾਪ ਛੱਡਦਾ ਜਾ ਰਿਹਾ ਹੈ। ਐਸ.ਬੀ.ਐਸ ਪੰਜਾਬੀ ਨਾਲ ਗੱਲਬਾਤ ਕਰਦਿਆਂ ਉਸਨੇ ਆਪਣੇ ਗਾਇਕੀ ਦੇ ਸਫ਼ਰ ਤੇ ਜ਼ਿੰਦਗੀ ਦੇ ਤਜ਼ੁਰਬੇ ਨਾਲ ਜੁੜੀਆਂ ਕੁਝ ਗੱਲਾਂ ਸਾਂਝੀਆਂ ਕੀਤੀਆਂ ਹਨ।
ਪਿਛਲੇ ਤਕਰੀਬਨ ਇੱਕ ਦਹਾਕੇ ਤੋਂ ਮੈਲਬੌਰਨ ਵਿੱਚ ਰਹਿ ਰਿਹਾ ਬਾਗੀ ਭੰਗੂ ਪੰਜਾਬੀ ਗਾਇਕੀ ਦਾ ਇੱਕ ਜਾਣਿਆ ਪਛਾਣਿਆ ਨਾਂ ਹੈ।
ਪੰਜਾਬ ਦੇ ਬਠਿੰਡਾ ਜਿਲ੍ਹੇ ਨਾਲ ਸਬੰਧ ਰੱਖਣ ਵਾਲੇ ਬਾਗੀ ਭੰਗੂ ਨੇ ਦੱਸਿਆ ਕਿ ਉਹ ਬਚਪਨ ਤੋਂ ਹੀ ਕਲਾ ਜਗਤ ਦੇ ਨਾਲ ਜੁੜਿਆ ਹੋਇਆ ਹੈ।
ਉਸਨੇ ਕਿਹਾ,"ਮੈਂ ਨਿੱਕੇ ਹੁੰਦਿਆਂ ਤੋਂ ਹੀ ਰੰਗਮੰਚ ਤੇ ਗਾਇਕੀ ਦਾ ਨਿੱਘ ਮਾਣਦਾ ਆ ਰਿਹਾ ਹਾਂ।"
"ਮੇਰੇ ਮਾਤਾ ਗੁਰਪ੍ਰੀਤ ਭੰਗੂ ਜੋ ਕਿ ਹੁਣ ਪੰਜਾਬੀ ਫ਼ਿਲਮਾਂ ਦਾ ਇੱਕ ਜਾਣਿਆ-ਮਾਣਿਆ ਚੇਹਰਾ ਬਣ ਚੁੱਕੇ ਹਨ, ਬਹੁਤ ਲੰਬੇ ਅਰਸੇ ਤੋਂ ਰੰਗਮੰਚ ਦੇ ਨਾਲ ਜੁੜੇ ਹੋਏ ਹਨ, ਤੇ ਮੈਂ ਅਕਸਰ ਹੀ ਉਨ੍ਹਾਂ ਦੇ ਥੀਏਟਰ ਨਾਟਕਾਂ ਵਿੱਚ ਬਾਲ ਕਲਾਕਾਰ ਵਜੋਂ ਜਾਇਆ ਕਰਦਾ ਸੀ।"
.jpeg?imwidth=1280)
ਬਾਲ ਕਲਾਕਾਰ ਵਜੋਂ ਬਾਲ ਸਭਾਵਾਂ ਤੋਂ ਲੈ ਕੇ ਰੰਗਮੰਚ ਦੀਆਂ ਸਟੇਜਾਂ ਤੱਕ ਆਪਣੇ ਗਾਇਕੀ ਦੇ ਸਫ਼ਰ ਦੀ ਸ਼ੁਰੂਆਤ ਕਰਨ ਵਾਲੇ ਬਾਗੀ ਨੇ ਹੁਣ ਤੱਕ ਕਈ ਪ੍ਰਸਿੱਧ ਗੀਤ ਪੇਸ਼ ਕੀਤੇ ਹਨ।
ਉਸਦੇ ਕਈ ਗੀਤ ਯੂ-ਟਿਊਬ, ਫੇਸਬੁਕ ਤੇ ਇੰਸਟਾਗ੍ਰਾਮ ਵਰਗੇ ਸੋਸ਼ਲ ਮੀਡੀਆ ਪਲੈਟਫਾਰਮ ਤੇ ਲੱਖਾਂ-ਕਰੋੜਾਂ ਦੀ ਗਿਣਤੀ ਵਿੱਚ ਸੁਣੇ ਜਾ ਚੁੱਕੇ ਹਨ-ਦੇਖੇ ਜਾ ਚੁੱਕੇ ਹਨ।
