ਗੋਲਡ ਕੋਸਟ (ਕੁਈਨਸਲੈਂਡ) ਦੀ ਰਹਿਣ ਵਾਲੀ ਅਨੂ ਸਮਰਾ ਨੂੰ ਬੀਤੇ ਦਿਨੀ ਮੈਲਬੌਰਨ 'ਚ ਆਯੋਜਿਤ ਹੋਏ 'ਮਿਸਜ਼ ਪੰਜਾਬਣ-ਆਸਟ੍ਰੇਲੀਆ' ਦਾ ਤਾਜ਼ ਪਹਿਨਾਇਆ ਗਿਆ. ਸਾਲ 2017 ਦੇ ਇਸ ਟਾਈਟਲ ਨੂੰ ਜਿੱਤਣ ਖ਼ਾਤਿਰ ਸ਼੍ਰੀਮਤੀ ਸਮਰਾ ਨੇ ਮੈਲਬੌਰਨ ਸਣੇ ਸਿਡਨੀ, ਬ੍ਰਿਸਬੇਨ, ਪਰਥ ਆਦਿ ਸ਼ਹਿਰਾਂ ਤੋਂ ਆਈਆਂ 24 ਪ੍ਰਤੀਭਾਗੀਆਂ ਨੂੰ ਪਿੱਛੇ ਛਡਿਆ।
ਪੰਜਾਬ ਦੇ ਜਲੰਧਰ ਸ਼ਹਿਰ ਦੀ ਜੰਮਪਲ ਅਨੂ 12 ਸਾਲ ਪਹਿਲਾ ਯੂ.ਕੇ. ਦੇ ਜੰਮੇ ਅਤੇ ਆਸਟ੍ਰੇਲੀਆ ਦੇ ਵਸਨੀਕ ਭਾਰਤੀ ਮੂਲ ਦੇ ਜੈੱਫ ਸਮਰਾ ਨਾਲ ਵਿਆਹ ਕੇ ਇਥੇ ਆਈ.
ਗੋਲਡ ਕੋਸਟ ਸ਼ਹਿਰ 'ਚ ਰਿਟੇਲ ਵਪਾਰ ਚਲਾਉਣ ਵਾਲੀ ਅਨੂ ਦੱਸਦੀ ਹੈ, "ਮੈਨੂੰ ਪੰਜਾਬੀ ਸਭਿਆਚਾਰ ਤੇ ਵਿਰਸੇ ਬਾਰੇ ਮਹੀਨ ਜਾਣਕਾਰੀਆਂ ਆਪਣੀ ਸੱਸ ਤੋਂ ਮਿਲੀਆਂ". ਉਹਨਾ ਦੱਸਿਆ ਕਿ ਪਰਿਵਾਰ ਦਾ ਸਾਥ ਹਮੇਸ਼ਾ ਤੋਂ ਹੀ ਉਹਨਾਂ ਦੇ ਨਾਲ ਸੀ.
ਖਾਲਸਾ ਕਾਲਜ, ਜਲੰਧਰ 'ਚ ਪੜਦੇ ਹੋਏ ਹੀ, ਅਨੂ ਨੇ ਯੂਨੀਵਰਸਿਟੀ ਪੱਧਰ ਦੇ ਰੰਗਾਰੰਗ ਪ੍ਰੋਗਰਾਮਾਂ 'ਚ ਭਾਗ ਲੈਣਾ ਸ਼ੁਰੂ ਕਰ ਦਿੱਤਾ ਸੀ. ਓਦੋਂ ਤੋਂ ਹੀ ਅਨੂ ਨੂੰ ਸਟੇਜ ਦੀ ਚਟਕ ਲੱਗ ਗਈ. "ਪਰ ਆਸਟ੍ਰੇਲੀਆ 'ਚ ਪਰਿਵਾਰਕ ਜਿੰਦਗੀ ਬਿਤਾਉਂਦੇ ਹੋਏ, ਕਿਸੇ ਇੰਨੇ ਵੱਡੇ ਸਟੇਜ ਦਾ ਹਿੱਸਾ ਬਣਨਾ, ਨਾਮੁਮਕਿਨ ਜਿਹਾ ਜਾਪਦਾ ਹੈ".
ਉਹ ਇੱਕ ਬੇਟੇ ਦੀ ਮਾਂ ਹਨ, ਅਤੇ ਹੁਣ ਇਸ ਜਿੱਤ ਦੇ ਨਾਲ ਮਿਲੀ ਜਿੰਮੇਵਾਰੀ ਨੂੰ ਉਹ ਖੁਦ ਦੇ ਘਰ ਤੋਂ ਸ਼ੁਰੂ ਕਰਨਾ ਚਾਹੁੰਦੇ ਹਨ. ਅਨੂ ਦੀ ਖ਼ਵਾਇਸ਼ ਹੈ ਕਿ ਉਹ ਆਸਟ੍ਰੇਲੀਆ ਵਸਦੀ ਨੌਜਵਾਨ ਪੰਜਾਬੀ ਪੀੜ੍ਹੀ ਨੂੰ ਵਿਰਸੇ ਅਤੇ ਭਾਸ਼ਾ ਦੇ ਨਾਲ ਜੋੜਣ।
