ਅਮਰੀਕਾ-ਈਰਾਨ ਜੰਗ ਦੇ ਲੰਮਾ ਖਿੱਚਣ ਕਾਰਨ ਆਸਟ੍ਰੇਲੀਆ ਵਿੱਚ ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ‘ਤੇ ਦਬਾਅ ਜਾਰੀ ਹੈ। ਇਸਦੇ ਨਾਲ ਹੀ ਰਿਜ਼ਰਵ ਬੈਂਕ ਵੱਲੋਂ ਨਕਦੀ ਦਰਾਂ ਵਿੱਚ ਵਾਧੇ ਨੇ ਪਰਿਵਾਰਾਂ ਲਈ ਖਰਚੇ ਸੰਭਾਲਣ ਨੂੰ ਹੋਰ ਮੁਸ਼ਕਿਲ ਬਣਾ ਦਿੱਤਾ ਹੈ। ਇਸ ਰਿਪੋਰਟ ਵਿੱਚ ਜਾਣੋ ਕਿ ਵੱਧ ਰਹੀਆਂ ਈਂਧਨ ਕੀਮਤਾਂ, ਕਿਰਾਏ, ਮੋਰਟਗੇਜ ਅਤੇ ਰੋਜ਼ਾਨਾ ਦੇ ਖਰਚਿਆਂ ਦੇ ਦੌਰਾਨ ਆਸਟ੍ਰੇਲੀਆ 'ਚ ਲੋਕਾਂ ਲਈ ਕਿਹੜੀਆਂ ਮੁਫ਼ਤ ਅਤੇ ਸੁਤੰਤਰ ਮਾਲੀ ਸਹਾਇਤਾ ਸੇਵਾਵਾਂ ਉਪਲਬਧ ਹਨ।
ਆਸਟ੍ਰੇਲੀਆ ਵਿੱਚ ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ‘ਤੇ ਦਬਾਅ ਜਾਰੀ ਹੈ ਕਿਉਂਕਿ ਅਮਰੀਕਾ-ਈਰਾਨ ਜੰਗ ਹੁਣ ਆਪਣੇ ਤੀਜੇ ਮਹੀਨੇ ਵਿੱਚ ਦਾਖਲ ਹੋ ਚੁੱਕੀ ਹੈ।
ਆਸਟ੍ਰੇਲੀਆਈ ਪਰਿਵਾਰਾਂ ਲਈ ਇਸ ਮਹੀਨੇ ਰਿਜ਼ਰਵ ਬੈਂਕ ਆਫ਼ ਆਸਟ੍ਰੇਲੀਆ ਵੱਲੋਂ ਨਕਦੀ ਦਰਾਂ ਵਿੱਚ ਵਾਧਾ ਕਰਨ ਦੇ ਫੈਸਲੇ ਤੋਂ ਬਾਅਦ ਇਹ ਦਬਾਅ ਹੋਰ ਵੱਧ ਗਿਆ ਹੈ।
ਲੋਕਾਂ ਨੂੰ ਇੱਕ ਪਾਸੇ ਪੈਟਰੋਲ ਪੰਪ ‘ਤੇ ਵੱਧ ਭੁਗਤਾਨ ਕਰਨਾ ਪੈ ਰਿਹਾ ਹੈ, ਜਦਕਿ ਦੂਜੇ ਪਾਸੇ ਵੱਧ ਰਹੀਆਂ ਕਰਿਆਨੇ ਦੀਆਂ ਕੀਮਤਾਂ, ਕਿਰਾਏ, ਮੋਰਟਗੇਜ ਅਤੇ ਹੋਰ ਜ਼ਰੂਰੀ ਖਰਚਿਆਂ ਨਾਲ ਵੀ ਨਜਿੱਠਣਾ ਪੈ ਰਿਹਾ ਹੈ।
‘ਆਸਟ੍ਰੇਲੀਆ ਐਕਸਪਲੇਨਡ: ਫਿਊਲ ਇਨ ਫੋਕਸ’ ਦੇ ਇਸ ਐਪੀਸੋਡ ਵਿੱਚ ਅਸੀਂ ਉਹਨਾਂ ਮੁਫ਼ਤ ਅਤੇ ਸੁਤੰਤਰ ਸੇਵਾਵਾਂ ਬਾਰੇ ਜਾਣਦੇ ਹਾਂ ਜੋ ਲੋਕਾਂ ਨੂੰ ਆਰਥਿਕ ਤਣਾਅ ਨਾਲ ਨਜਿੱਠਣ ਵਿੱਚ ਮਦਦ ਕਰ ਰਹੀਆਂ ਹਨ।
ਮੈਲਬੌਰਨ ਦੇ ਨਿਵਾਸੀ ਇਮਤਿਆਜ਼ ਅਹਿਮਦ ਆਈਟੀ ਖੇਤਰ ਵਿੱਚ ਪੂਰਾ ਸਮਾਂ ਕੰਮ ਕਰਦੇ ਹਨ, ਪਰ ਆਪਣੇ ਪਰਿਵਾਰ ਦਾ ਖਰਚਾ ਚਲਾਉਣ ਲਈ ਉਹ ਹਫ਼ਤਾਅੰਤ, ਛੁੱਟੀਆਂ ਅਤੇ ਸ਼ਾਮ ਦੇ ਸਮੇਂ ਟੈਕਸੀ ਅਤੇ ਰਾਈਡਸ਼ੇਅਰ ਵੀ ਚਲਾਉਂਦੇ ਹਨ।
ਉਹ ਕਹਿੰਦੇ ਹਨ ਕਿ ਇੱਕ ਨੌਕਰੀ ਨਾਲ ਘਰ ਚਲਾਉਣਾ ਮੁਸ਼ਕਿਲ ਹੋ ਗਿਆ ਹੈ।
ਅਹਿਮਦ ਕਹਿੰਦੇ ਹਨ ਕਿ ਵਧੀਆਂ ਈਂਧਨ ਕੀਮਤਾਂ ਸਿਰਫ਼ ਇੱਕ ਸਮੱਸਿਆ ਨਹੀਂ ਹਨ।
ਘੱਟ ਯਾਤਰੀ, ਰਾਈਡਸ਼ੇਅਰ ਪਲੇਟਫ਼ਾਰਮਾਂ ਦੀਆਂ ਵਧੀਆਂ ਕਮਿਸ਼ਨਾਂ ਅਤੇ ਰੋਜ਼ਾਨਾ ਦੇ ਜੀਵਨ ਖਰਚਿਆਂ ਨੇ ਡਰਾਈਵਰਾਂ ਲਈ ਗੁਜ਼ਾਰਾ ਕਰਨਾ ਹੋਰ ਔਖਾ ਬਣਾ ਦਿੱਤਾ ਹੈ।
ਹੁਣ ਅਹਿਮਦ ਨੈਸ਼ਨਲ ਡੈੱਬਟ ਹੈਲਪਲਾਈਨ ਨਾਲ ਸੰਪਰਕ ਕਰਨ ਬਾਰੇ ਸੋਚ ਰਹੇ ਹਨ। ਇਹ ਇੱਕ ਮੁਫ਼ਤ, ਸੁਤੰਤਰ ਅਤੇ ਗੋਪਨੀਯ ਸੇਵਾ ਹੈ ਜੋ ਪੂਰੇ ਆਸਟ੍ਰੇਲੀਆ ਵਿੱਚ ਉਪਲਬਧ ਹੈ।
ਇਹ ਹੈਲਪਲਾਈਨ ਆਰਥਿਕ ਤਣਾਅ ਦਾ ਸਾਹਮਣਾ ਕਰ ਰਹੇ ਲੋਕਾਂ ਨੂੰ ਫਾਇਨੈਂਸ਼ਲ ਕਾਊਂਸਲਰਾਂ ਨਾਲ ਜੋੜਦੀ ਹੈ, ਜੋ ਉਨ੍ਹਾਂ ਨੂੰ ਉਨ੍ਹਾਂ ਦੇ ਅਧਿਕਾਰਾਂ ਅਤੇ ਉਪਲਬਧ ਵਿਕਲਪਾਂ ਬਾਰੇ ਜਾਣਕਾਰੀ ਦਿੰਦੇ ਹਨ।
ਨੈਸ਼ਨਲ ਡੈੱਬਟ ਹੈਲਪਲਾਈਨ ਦੀ ਵਿਕੀ ਸਟਾਫ ਕਹਿੰਦੀ ਹੈ ਕਿ ਅੱਜਕੱਲ੍ਹ ਕਈ ਲੋਕ ਆਪਣੀ ਆਮਦਨ ਦਾ ਵੱਡਾ ਹਿੱਸਾ ਈਂਧਨ ਅਤੇ ਖਾਣ-ਪੀਣ ਵਰਗੀਆਂ ਜ਼ਰੂਰੀ ਚੀਜ਼ਾਂ ‘ਤੇ ਖਰਚ ਕਰ ਰਹੇ ਹਨ, ਜਿਸ ਕਾਰਨ ਹੋਰ ਮਹੱਤਵਪੂਰਨ ਖਰਚਿਆਂ ਲਈ ਘੱਟ ਪੈਸਾ ਬਚਦਾ ਹੈ।
ਸਟਾਫ ਕਹਿੰਦੀ ਹੈ ਕਿ ਕਈ ਲੋਕਾਂ ਨੂੰ ਇਹ ਪਤਾ ਹੀ ਨਹੀਂ ਹੁੰਦਾ ਕਿ ਉਹ ਬੈਂਕ ਜਾਂ ਕਰਜ਼ਾ ਦੇਣ ਵਾਲੀ ਸੰਸਥਾ ਕੋਲੋਂ “ਫਾਇਨੈਂਸ਼ਲ ਹਾਰਡਸ਼ਿਪ ਅਰੇਂਜਮੈਂਟ” ਦੀ ਮੰਗ ਕਰ ਸਕਦੇ ਹਨ।
“ਫਾਇਨੈਂਸ਼ਲ ਹਾਰਡਸ਼ਿਪ ਅਰੇਂਜਮੈਂਟ ਦੇ ਤਹਿਤ ਕੁਝ ਸਮੇਂ ਲਈ ਭੁਗਤਾਨ ਰੋਕਿਆ ਜਾ ਸਕਦਾ ਹੈ। ਜਾਂ ਫਿਰ ਛੋਟੀ ਰਕਮ ਨੂੰ ਲੰਬੇ ਸਮੇਂ ਵਿੱਚ ਅਦਾ ਕਰਨ ਦੀ ਵਿਵਸਥਾ ਕੀਤੀ ਜਾ ਸਕਦੀ ਹੈ। ਲੋਕਾਂ ਲਈ ਕਈ ਵਿਕਲਪ ਉਪਲਬਧ ਹਨ ਅਤੇ ਫਾਇਨੈਂਸ਼ਲ ਕਾਊਂਸਲਰ ਉਨ੍ਹਾਂ ਬਾਰੇ ਜਾਣਕਾਰੀ ਦਿੰਦੇ ਹਨ।”
ਉਹ ਕਹਿੰਦੀ ਹੈ ਕਿ ਸਹੀ ਸਲਾਹ ਅਤੇ ਵਿਹਾਰਿਕ ਹੱਲ ਦੇਣ ਲਈ ਕਾਊਂਸਲਰਾਂ ਨੂੰ ਵਿਅਕਤੀ ਦੀ ਪੂਰੀ ਮਾਲੀ ਸਥਿਤੀ ਨੂੰ ਸਮਝਣਾ ਪੈਂਦਾ ਹੈ।
ਨੈਸ਼ਨਲ ਡੈੱਬਟ ਹੈਲਪਲਾਈਨ ਨਾਲ ਸੰਪਰਕ ਕਰਨ ਦੇ ਤਿੰਨ ਤਰੀਕੇ ਹਨ।
ਲੋਕ 1800 007 007 ‘ਤੇ ਫੋਨ ਕਰ ਸਕਦੇ ਹਨ, ndh.org.au ਵੈੱਬਸਾਈਟ ‘ਤੇ ਜਾ ਸਕਦੇ ਹਨ ਜਾਂ ਵੈੱਬਸਾਈਟ ‘ਤੇ ਉਪਲਬਧ ਲਾਈਵ ਚੈਟ ਸੇਵਾ ਦੀ ਵਰਤੋਂ ਕਰ ਸਕਦੇ ਹਨ।
ਅੰਗਰੇਜ਼ੀ ਤੋਂ ਇਲਾਵਾ ਹੋਰ ਭਾਸ਼ਾਵਾਂ ਬੋਲਣ ਵਾਲਿਆਂ ਲਈ ਹੈਲਪਲਾਈਨ ਕਾਲ ਦੌਰਾਨ ਦੁਭਾਸ਼ੀਆ ਸਹਾਇਤਾ ਵੀ ਉਪਲਬਧ ਕਰਵਾ ਸਕਦੀ ਹੈ।
ਸਟਾਫ ਕਹਿੰਦੀ ਹੈ ਕਿ ਮਦਦ ਦੀ ਮੰਗ ਕਾਫੀ ਵੱਧ ਹੈ, ਇਸ ਲਈ ਰੁੱਝੇ ਸਮੇਂ ਦੌਰਾਨ ਲੋਕਾਂ ਨੂੰ ਉਡੀਕ ਕਰਨੀ ਪੈ ਸਕਦੀ ਹੈ।
ਪਰ ਉਹ ਸਲਾਹ ਦਿੰਦੀ ਹੈ ਕਿ ਜੇਕਰ ਤੁਰੰਤ ਸੰਪਰਕ ਨਾ ਹੋਵੇ ਤਾਂ ਬਾਅਦ ਵਿੱਚ ਮੁੜ ਕੋਸ਼ਿਸ਼ ਕਰੋ ਜਾਂ ਲਾਈਵ ਚੈਟ ਵਰਗਾ ਹੋਰ ਵਿਕਲਪ ਵਰਤੋ।
ਨਿਵਾਸੀਆਂ ਨੂੰ ਇਸ ਲਈ ਵੀ ਉਤਸ਼ਾਹਿਤ ਕੀਤਾ ਗਿਆ ਹੈ ਕਿ ਉਹ ਕਮਿਊਨਿਟੀ ਸੰਸਥਾਵਾਂ ਵੱਲੋਂ ਉਪਲਬਧ ਹੋਰ ਮੁਫ਼ਤ ਸਹਾਇਤਾ ਸੇਵਾਵਾਂ ਬਾਰੇ ਵੀ ਜਾਣਕਾਰੀ ਲੈਣ। ਇਨ੍ਹਾਂ ਵਿੱਚ ਸੈਲਵੇਸ਼ਨ ਆਰਮੀ ਦੀ ਮਨੀਕੇਅਰ ਸੇਵਾ, ਕੁਝ ਐਂਗਲੀਕੇਅਰ ਫਾਇਨੈਂਸ਼ਲ ਕਾਊਂਸਲਿੰਗ ਸੇਵਾਵਾਂ, ਕਮਿਊਨਿਟੀ ਲੀਗਲ ਸੈਂਟਰ, ਮੌਬ ਸਟਰਾਂਗ ਡੈੱਬਟ ਹੈਲਪ ਅਤੇ ਫਾਇਨੈਂਸ਼ਲ ਰਾਈਟਸ ਲੀਗਲ ਸੈਂਟਰ ਸ਼ਾਮਲ ਹਨ।
ਹੋਰ ਵੇਰਵੇ ਲਈ ਆਡੀਓ ਬਟਨ ਕਲਿਕ ਕਰੋ
ਐਸ ਬੀ ਐਸ ਪੰਜਾਬੀ ਦੁਨੀਆ ਸਾਡੇ ਸਾਰੇ ਪੌਡਕਾਸਟ ਇਸ ਲਿੰਕ ਰਾਹੀਂ ਸੁਣੇ ਜਾ ਸਕਦੇ ਹਨ।
ਭਰ ਦੀਆਂ ਤਾਜ਼ਾ-ਤਰੀਨ ਖ਼ਬਰਾਂ ਸਮੇਤ ਉਨ੍ਹਾਂ ਕਹਾਣੀਆਂ ਨਾਲ ਜੋੜਦਾ ਹੈ ਜੋ ਆਸਟ੍ਰੇਲੀਆ ਵਿਚਲੇ ਜੀਵਨ ਅਤੇ ਪੰਜਾਬੀ ਬੋਲਣ ਵਾਲੇ ਆਸਟ੍ਰੇਲੀਅਨ ਭਾਈਚਾਰੇ ਲਈ ਅਹਿਮ ਹਨ।
ਸਾਡਾ ਲਾਈਵ ਪ੍ਰੋਗਰਾਮ ਤੁਸੀਂ ਸੋਮਵਾਰ ਤੋਂ ਸ਼ੁੱਕਰਵਾਰ ਸ਼ਾਮ 4 ਵਜੇ SBS ਸਾਊਥ ਏਸ਼ੀਅਨ ਦੇ ਡਿਜੀਟਲ ਰੇਡੀਓ ਉੱਤੇ, ਆਪਣੇ ਟੈਲੀਵਿਜ਼ਨ 'ਤੇ ਚੈਨਲ 305 ਉੱਤੇ, SBS ਆਡੀਓ ਐਪ ਜਾਂ ਸਟ੍ਰੀਮ ਰਾਹੀਂ ਸੁਣ ਸਕਦੇ ਹੋ। ਹੋਰ ਜਾਣਕਾਰੀ ਲਈ ਸਾਨੂੰ ਵੈਬਸਾਈਟ, ਫੇਸਬੁੱਕ ਅਤੇ ਇੰਸਟਾਗ੍ਰਾਮ 'ਤੇ ਫਾਲੋ ਕਰੋ।
