ਮੈਲਬੌਰਨ ਦੇ ਪੱਛਮ ਵਿੱਚ ਸਥਿੱਤ ਵੁਡਲੀ ਇਲਾਕੇ ਵਿੱਚ 26 ਅਕਤੂਬਰ ਨੂੰ 'ਵਿਸ਼ਵ ਦੇ ਸਭ ਤੋਂ ਵੱਡੇ ਫੁੱਟਬਾਲ ਸਬਕ' ਦਾ ਰਿਕਾਰਡ ਬਣਾਇਆ ਗਿਆ ਹੈ। ਮਨਦੀਪ ਸਿੰਘ ਅਤੇ ਉਸਦੇ ਪਰਿਵਾਰ ਸਮੇਤ 800 ਤੋਂ ਵੀ ਵੱਧ ਲੋਕਾਂ ਨੇ ਗਿੰਨੀਜ਼ ਵਰਲਡ ਰਿਕਾਰਡ ਬਣਾਉਣ ਦੀ ਇਸ ਸਫ਼ਲ ਕੋਸ਼ਿਸ਼ ਵਿੱਚ ਹਿੱਸਾ ਲਿਆ। ਪੂਰੀ ਜਾਣਕਾਰੀ ਲਈ ਸੁਣੋ ਇਹ ਗੱਲਬਾਤ।
ਫ਼ੁੱਟਬਾਲ ਨੂੰ ਉਤਸ਼ਾਹਿਤ ਕਰਨ ਦੇ ਇਰਾਦੇ ਨਾਲ਼ 26 ਅਕਤੂਬਰ ਨੂੰ ਰੌਕਬੈਂਕ ਦੇ ਫਰੰਟੀਅਰ ਪਾਰਕ ਵਿੱਚ ਲੋਕਾਂ ਨੂੰ ਇੱਕ ਖਾਸ ਸਮਾਗਮ ਵਿੱਚ ਹਿੱਸਾ ਲੈਣ ਲਈ ਸੱਦਿਆ ਗਿਆ।
ਇਸ ਵੱਡੇ ਇਕੱਠ ਵਿੱਚ ਇੱਕ ਪੰਜਾਬੀ ਪਰਿਵਾਰ ਵੀ ਸ਼ਾਮਿਲ ਸੀ ਜਿਸਨੇ 'ਵਿਸ਼ਵ ਦੇ ਸਭ ਤੋਂ ਵੱਡੇ ਫ਼ੁੱਟਬਾਲ (ਸੌਕਰ) ਸਬਕ' ਲਈ ਗਿੰਨੀਜ਼ ਵਰਲਡ ਰਿਕਾਰਡ ਬਣਾਉਣ ਦੀ ਸਫਲ ਕੋਸ਼ਿਸ਼ ਵਿੱਚ ਆਪਣਾ ਹਿੱਸਾ ਪਾਇਆ।
ਮਨਦੀਪ ਸਿੰਘ ਨੇ ਐਸ ਬੀ ਐਸ ਪੰਜਾਬੀ ਨੂੰ ਦੱਸਿਆ ਕਿ 835 ਲੋਕਾਂ ਦੇ ਇੱਕ ਸਮੂਹ ਨੇ ਅੱਧੇ ਘੰਟੇ ਲਈ ਫ਼ੁੱਟਬਾਲ (ਸੌਕਰ) ਦੀ ਸਿਖਲਾਈ ਲੈਕੇ ਇਹ ਰਿਕਾਰਡ ਬਣਾਇਆ ਹੈ।
ਸ਼੍ਰੀ ਸਿੰਘ ਦਾ ਬੇਟਾ ਤਵਨੂਰ ਸਿੰਘ ਫੁੱਟਬਾਲ ਦੀ ਖੇਡ ਨੂੰ ਖਾਸ ਤੌਰ 'ਤੇ ਪਸੰਦ ਕਰਦਾ ਹੈ - "ਅਸੀਂ ਚਾਹੁੰਦੇ ਸੀ ਕਿ ਖੇਡਾਂ ਵਾਲ਼ੀ ਜੀਵਨਸ਼ੈਲੀ ਉਸਦੀ ਜ਼ਿੰਦਗੀ ਦਾ ਹਿੱਸਾ ਬਣੇ ਅਤੇ ਉਹ ਇਸ ਗੱਲ ਦੀ ਅਹਿਮੀਅਤ ਨੂੰ ਜਾਣ ਸਕੇ ਕਿ ਇੱਕ ਨਰੋਏ ਸਰੀਰ ਵਿੱਚ ਹੀ ਨਰੋਆ ਮਨ ਵਾਸ ਕਰਦਾ ਹੈ।"
ਸਾਨੂੰ ਇਸ ਗੱਲ ਦੀ ਵੀ ਖੁਸ਼ੀ ਹੋਈ ਕਿ ਰਿਕਾਰਡ ਤੋੜ੍ਹਨ ਲਈ ਸਾਡੇ ਆਪਣੇ ਸਿੱਖ ਭਾਈਚਾਰੇ ਵਿੱਚੋਂ ਬਹੁਤ ਸਾਰੇ ਲੋਕਾਂ ਵੱਧ-ਚੜ੍ਹ ਕੇ ਹਿੱਸਾ ਪਾਇਆ। ਇਸ ਦਿਨ ਥੋੜ੍ਹਾ ਮੀਂਹ ਵੀ ਪੈ ਰਿਹਾ ਸੀ ਪਰ ਲੋਕਾਂ ਦੇ ਉਤਸ਼ਾਹ ਵਿੱਚ ਕੋਈ ਕਮੀ ਨਹੀਂ ਸੀ।
ਪੂਰੀ ਜਾਣਕਾਰੀ ਲਈ ਸੁਣੋ ਉੱਪਰ ਦਿੱਤੀ ਗੱਲਬਾਤ…
26 ਅਕਤੂਬਰ ਦੇ ਇਸ ਸਮਾਗਮ ਵਿੱਚ ਸਾਬਕਾ ਸੋਕਰੂਸ ਖਿਡਾਰੀ ਕੇਵਿਨ ਮਸਕਟ ਅਤੇ ਮਟਿਲਡਾਅਜ਼ ਸਟਰਾਈਕਰ ਅਤੇ ਵਿਸ਼ਵ ਰਿਕਾਰਡ ਹੋਲ੍ਡਰ ਕੀਆ ਸਾਈਮਨ ਉਚੇਚੇ ਤੌਰ 'ਤੇ ਸ਼ਾਮਿਲ ਹੋਏ - ਇਸ ਦੌਰਾਨ ਬ੍ਰਾਜ਼ੀਲ ਦੇ ਪੰਜ ਸਾਬਕਾ ਪੇਸ਼ੇਵਰ ਖਿਡਾਰੀ ਵੀ ਹਾਜ਼ਿਰ ਹੋਏ।
ਦੱਸਣਯੋਗ ਹੈ ਕਿ ਕਿ ਇਸ ਕਿਸਮ ਦਾ ਪਹਿਲਾ ਰਿਕਾਰਡ 705 ਲੋਕਾਂ ਦੇ ਇੱਕ ਸਮੂਹ ਨੇ 8 ਅਪ੍ਰੈਲ, 2018 ਨੂੰ ਪੋਲੈਂਡ ਵਿੱਚ ਬਣਾਇਆ ਸੀ।
SBS Punjabi ਨੂੰ ਸੋਮਵਾਰ ਤੋਂ ਸ਼ੁੱਕਰਵਾਰ ਰਾਤ 9 ਵਜੇ ਸੁਣੋ ਅਤੇ ਸਾਨੂੰ Facebook ਤੇ Twitter 'ਤੇ ਫੌਲੋ ਕਰੋ।
