I le ripoti lenei na fa'amaopoopoina e Lilomaiava Maina Misa mai le nofoaga o loo faitauina ai le palota i Tuana'imato, i le o'o mai i le afiafi o le Aso Tofi, Aso 4 o Setema, ua maua e le FAST nofoa e 30, o lona uiga o se fa'asiliga, se majority, e mafai ona fa'avaeina ai se faigamalo e aunoa ma le fa'alagolago i seisi vaega 'upufai mo se so'ofa'atasiga.
E ui i le toe manumalo mai o le ta'ita'i o le Samoa ua Potopoto (SUP) le Afioga i le Sa'o Fa'apito Fiame Naomi Mata'afa i lona nofoa i Lotofaga, na o le to'a tolu isi sui o le SUP na manumalo, o le to'atele o sui o le Kapeneta i le faigamalo talu ai, e foliga mai ua le toe tula'i mai i o latou itumalo.
