O le Aosinasina Samoa i Sini o loo fa’amautū i le itūmālō o Campbelltown i Sisifo o Sini, ae o loo ofoina ana ‘au’aunaga i soo se tagata matua e fia ‘auai ma mauaina se fesoasoani.
E pei ona atagia i le igoa ‘Aosinasina’, o le tautua e ofoina i tagata matutua, ae maise i latou o loo nonofo i fale ma ‘āiga ua lē toe tele ni avanoa e feoa’i ai ma tafafao e pei ona sa masani ai.
Na fa’aalia e le failautusi o le Aosinasina, Seumanu To’ailoa, o le tele o ‘au’aunaga e aofia ai le fa’atulagaina o mafutaga mo tagata matutua e feiloa’i ai ma talanoa, fai ni ta’aloga e pei o le pelē suipi, ma fai sina fa’amalosi tino, se ipu tī ma sina taumafataga.
Na saunoa fo’i le peresitene, Seiuli Talalelei Leota, ua lē na o tagata matutua Samoa o loo ofo iai le ‘au’aunaga a le Aosinasina, ae ua fa’apenā ona ofoina i isi tagata matutua i le community, e pei o tagata muamua, tagata Maori.
Ina ua fesiligia le peresitene i ni alātupe o loo fa’agaioi ai polokalame a le Aosinasina, na ia tali mai o loo tagi lava i lima le fa’alapotopotoga ona o le fia tautuaina o le atunu’u.
E lē gata i lea, ua ofoina fo’i ni polokalame a le Aosinasina i a’oga i Campbelltown e fesoasoani ai i tupulaga i le gagana Samoa ma nisi o vaega o tū ma aganu’u.
O nisi o fesoasoani na ofoina i tagata faigaluega fa’avaitaimi mai Samoa o loo galulue i Ausetalia nei i lalo o le polokalame le PALM Scheme.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
