O le Elevated Cultural Festival, o loo sauni atu mo lana fa’aaliga lona 3 i Liverpool i Sini.
O le fa’aaliga lenei o siva ma tū a le Pasefika na fa’avaeina e le fa’alapotopotoga le Elevated Cultural Foundation, o lona fa’atonu o le ali’i Samoa, le Susuga Raymond Savai’inaea.
Na fa’aalia e Savai’inaea o le fa’alapotopotoga na amata fa’avaeina i le 2023 ma le fa’amoemoe e fa’amasani fanau a le Pasefika i Sini ia latou tū ma aganu’u ma a’oa’o fanau i siva a atumotu na afua mai ai o latou tua’ā.
O le fa’aaliga muamua a le Elevated Cultural Festival i le 2023, e 13 a’oga na auai iai, ae o le tausaga talu ai, na o’o ai le aofa’i o a’oga i le 19.
Ona o le vave ona fiafia ma talisapaia e mātua ma a’oga o lenei fa’amoemoe, ua resitaraina ai nei le Elevated Cultural Foundation o se charity, ma o le fa’aaliga o le Elevated Cultural Festival o le tausaga nei, o loo fa’amoemoe e faia i Liverpool.
Na fa’aalia e le fa’atonu ia Raymond Savai’inaea, o le fa’amoemoe ina ia fa’alautele le ‘au’aunaga e aofia ai polokalame i taimi o tu’uaga o a’oga, e a’oa’oina ai siva ma le gagana i fanau a le Pasefika.
Na ia ta’ua fo’i, o le naunauta’iga, ina ia ‘inclusive’ le festival, ina ia lē na o fanau a le Pasefika, ae mafai ona auai mai iai fanau a isi tagata ma tū ma aganu’u i Ausetalia.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan
