Ua fa’aalia popolega o nisi o lōia i Samoa i lenei fa’ai’uga a le matagaluega o leoleo ona o le lē talafeagai ma tū ma aga masani fa’aletulafono e tatau ai ona fa’amaonia muamua le moliaga o so’o se tagata ona fa’ato’ā fa’ailoa ai lea ua ia solia se tulafono – i le gagana Igilisi, o le ‘innocence until proven guilty’.
Na fa’aalia e se tasi o lōia sinia i Samoa i le Samoa Observer, a fa’apea na faia i se fa’atonuga a le palemia La’aulialemalietoa Leuatea Schmidt, o ia fo’i o le minisita o le matagaluega o leoleo ma falepuipui, sa tatau i le komesina lē tumau o le matagaluega ona fautuaina le lē talafeagai o lenei faai’uga.
Na ta’ua fo’i e se isi loia i le Samoa Obeserver le matuā lē talafeagai o le fa’ailoa ai o le ata, le igoa ma le nu’u o se tamaititi e 15 tausaga le matua i lenei fa’asalalauga a leoleo i le social media.
Atonu o le fesili e ono tula’i mai – a faapea nei ae mae’a fa’amasinoga ae lē fa’amaonia moliaga o nisi o i latou nei ua fa’atāsina o latou igoa ma ‘āiga i luga o le social media, e tatau i le mālō ona totogi ni taui poo damages i nei tagata?
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
