Ua fa'amutaina e le malo Samoa le tofiga o le Komesina o Leoleo Auapa'au Logoitino Filipo e pei ona lipotia e le Samoa Observer.
O ananafi na fa'ailoa ai e le sui minisita o leoleo Mulipola Anarosa Ale-Molioo ia Auapa'au Logoitino Filipo le faai'uga a le malo e faamuta lona toe avea ma Komesina o Leoleo.
Ua lata i le 30 tausaga o le tautua a Auapa'au Logoitino Filipo i le matagaluega o leoleo o le malo Samoa, ma ua 3 tausaga i le tofi Komesina talu ona tofia e sui tulaga ia Fuavailili Egon Keil i le 2022.
Na ia ta'ua i le Samoa Observer e le'i te'i pe maofa i le faai'uga ona na ia iloa o le i'uga lea e o'o iai talu ona molia e leoleo le palemia Laaulialemalietoa Leuatea Schmidt.
Ae o faasalalau le avanoa ma saili seisi e tau'aveina le tofi Komesina o leoleo i Samoa, ua se'e atu Samuelu Afamasaga, se tasi o sui Komesina e tau'aveina tiute o le Komesina se'ia tofia se Komesina o le matagaluega o leoleo.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan
