Faate'a minisita lagolago e to'a 13 i Samoa

E to'a 13 minisita lagolago o le faigamalo i Samoa ua faate'aina e le palemia, Fiame Naomi Mata'afa.

Palemia o le malo Samoa, Fiame Naomi Mataafa. Source: AAP / AAP/Samoa Observer

Na faaalia e le palemia i le 'autusitala, o le faai'uga e faate'a i latou nei ua faia ina ua latou le toe lagolagoina le malo.

E amata mai i le Aso Faraile ona le toe maua o latou totogi minisita lagolago, ae o le a totogi o ni sui faipule.

O le a tumau pea ona avea i latou ma sui faipule mo itumalo na manumalo mai ai, ma ua faatonuina fo'i i latou e toe faafo'i atu taavale a le malo o loo latou feoa'i ai.