E te silafia le tala fa’afāgogo o ‘Sina ma le Tuna’? O le tala lea e maua ai le igoa o le vai i Savai’i le ‘Mata o le Alelo’.
O le tala fo’i lea o loo talitonu na maua ai le la’au o le niu ma mata o le tuna pe a o’a se popo poo se niu e iloa ai foliga o mata ma le gutu o le tuna.
I le talanoaga lenei ma le Susuga Gabriel Satiu o le Satiu Studios i Sini, na ia fa’amatalaina ai lona soifuaga ma lana galuega tusitala ma le fa’atonuina o ata fa’atino e pu’eina (e pei o ata video/tifaga) ma tala e fa’atinoina i se stage.
Na ta’ua e Gabriel Satiu le aogā o tala fa’atino i lotu a tamaiti, o se amataga e iloa ai e se tamaititi ona fa’atino se vaega o le olaga o seisi tagata, poo le acting.
I Sisifo o Sini, o loo iai se fa’alapotopotoga na fa’avaeina e se ali’i Samoa e suafa ia Raymond Savai’inaea e fa’aigoaina o le ‘Elevated Cultures’, ma o se tasi o a latou polokalame, o le a’oa’oina lea o siva ma nisi o vaega o tū ma aga a tagata o le Pasefika, e aofia ai ma Samoa.
Na saunoa Gabriel Satiu i le talanoaga lenei ma le SBS Samoan, o lona sao i le taumafaiga lenei, o se performance a tamaiti e fa’atinoina ai le tala fa’afāgogo o ‘Sina ma le Tuna’ i se Hall i Sini i Sisifo.
Na ia ta’ua o se lesona ma se a’oga aogā mo tamaiti le tautala, siva, ma fa’atino se tala fa’afāgogo e pei o ‘Sina ma le Tuna’.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
