O Vui Masinamua na resitara e tauvā i le itumalo palota o Fa’asalele’aga Numera 5, ae na lipotia e le Samoa Observer lana fa’amatalaga ua ia usita’ia le finagalo o lona nu’u i le avea o Vui Sione I’iga ma o latou sui tauvā.
O Vui Masinamua ma Vui Sione I’iga o loo tauvā uma i le vaega ‘upufai le Fa’atuatua i le Atua Samoa ua Tasi (FAST).
Na lipotia fo’i e le Samoa Observer le le toe resitaraina o le suafa o Seu’ula Ioane Tua’au, le o loo avea nei ma minisita o A’oga, Ta’aloga ma Aganu’u i le malo tausi.
E foliga mai ai o le a na o le to’alua sui e faia iai le filifiliga a Alataua i Sisifo, o Aliimalemanu Alofa Tuuau o le HRPP, ma Tuituave Valo’aga Iona o le FAST.
