Faife'au ma faigapalota i Samoa.

I le talanoaga lenei ma le Susuga i le Fa'afeagaiga o le Ekalesia Fa'apotopotoga Kerisiano i Balmain, Sini, Rev Alo Filipaina, na ia aumai ai lona manatu i le talafeagai ona fa'atonu pe fa'amalosia ona tulei manatu o se faife'au i se vaega 'upufai e palota iai tagata o lana 'aulotu.

Lotu EFKS i Utuali'i. (Image - Usufono/SBS Samoan).

Na saunoa Rev Alo Filipaina, e mavaevae lava tulaga o le Lotu ma le Malo (Church and State), ma e le tatau ona so'ona aia le lotu poo se faife'au i le filifiliga sa'oloto a le tagata i le vaega 'upufai e fia palota iai.

E ui i lea, na saunoa fo'i le fa'afeagaiga ia Rev Alo Filipaina, a iai ni vaega e le o amiotonu i le fa'afoeina o se faigamalo poo palota, e tatau ona savavali le 'aufaigaluega e fa'atino le tiute o le fautua.

Na ia saunoa fo'i, o faiga fa'apolitiki e aofia ai le soifuaga o tagata uma, ma e ui i le 'Separation of Church and State,' e iai lava le tiute o faife'au ona o le soifuaga manuia o tagata lautele ma tagata lolotu.