Na ta'ua e Sione Teisi o lona soifuaga mai le taimi na a'oga ai i se a'oga maualuga i Sini ma tofia ai o ia o le Head Boy o le a'oga, na ia lagonaina le vala'au e ofoina lana tautua mo ona tagata Pasefika i soo se auala e mafai ai.
E pei ona ia ta'ua i le talanoaga lenei ma Miriama Pomare, i nisi o tofiga o loo galue ai, ua ia molimauina le tulaga o loo ola ai nisi o tupulaga talavou e afua mai atunu'u o le Pasefika i le taulaga o Sini, ma o se tulaga e fa'anoanoa ai le molimauina o tupulaga Pasefika ma fa'afitauli i le tulafono ma pei ua leai se fa'amoemoe i se lumana'i manuia.
Na fa'atalanoaina ai fo'i se tama'ita'i Samoa o loo galue i le fa'amasinoga, na ia ta'ua ai le molimauina o tupulaga Pasefika i le tele o aso e tula'i ai e tali moliaga i le fa'amasinoga.
Ua to'a 39 sui o le NSW Pacific Youth Council e ui e le'i tatalaina aloa'ia, ae o loo iai le fa'amoemoe e tatalaina ma resitaraina i le fa'ai'uga o le tausaga nei.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan
