Lagolagoina tinā ma fanau teine i le Pasefika (WFWP)

Na maua se avanoa e talanoa ai ma se tasi o tama’ita’i Samoa, le tinā ia Tua Manase-Ale mai alaalafaga o Sale'aula ma Safune i Savai'i, ae o loo aumau nei ma galue i Melbourne. O Tua Manase-Ale na ‘auai i le Fono a Samoa i Vitoria, ae o loo galue nei i le fa’alapotopotoga le Women's Federation for World Peace (WFWP) o loo fesoasoani i le itupā o tinā ma tama’ita’i i le Pasefika.

Tua Manase-Ale, Women's Federation for World Peace. (Image Supplied).

O nisi o polokalame a le Women’s Federation for World Peace, e aofia ai ni sikolasipi e mafai ai e alo ma fanau e agava’a ona a’o’oga i a’oga e pei o Univesite ma a’oga matātā ‘ese’ese i le Pasefika.

E pei ona silafia, o le tulaga lava lea e taofiofia ai le taumafaiga a nisi o fanau ona o le ‘uti’uti o le seleni a mātua ma faigatā ai ona totogi pili e fa’aauau ai le taumafai o fanau i a’oga.

O se tasi o polokalame e fesoasoani ai le Women’s Federation for World Peace o le fa’avaeina lea o pisinisi laiti a tin ma tama’ita’i i le Pasefika, e auala i fesoasoani tupe, le 'micro-credit projects' e nonōina ai tupe e amata ai se pisinisi, e pei o meataulima, fale’aiga, poo soasaiete fale lalaga.

Na saunoa Tua Manase-Ale, o se tasi o polokalame o loo fa’agaioia e le Women’s Federation for World Peace o fale su’isu’i (Women's Sewing Centres) o loo maua ai galuega a tinā ma tama’ita’i i Samoa, atu Solomona, Vanuatu, Fiti ma Papua New Guinea.

Na ia ta’ua e ofoina e le WFWP la’au su’isu’i ma a’oga, ma le fa’amoemoe ina ia fesoasoani e tuleia pisinisi ma se tulaga tuto’atasi manuia o tina ma le fanau teine i le Pasefika.

Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.