Na fa’aalia i se ripoti a le Samoa Observer se talanoaga a le palemia La'aulialemalietoa Leuatea Schmidt ma tusitala i Samoa na ia ta’ua ai le ono fa’avaeina e le mālō o se isi iuni lakapī fou e sui tulaga i le Lakapī Samoa.
Ina ua fesiligia le palemia i le mafua’aga o le taofia o tupe e fa’atupeina ai le Lakapī Samoa, na tali Laaulialemalietoa, e lē toe faatupeina e le mālō le iuni se’i vaganā ua talia e le board o le Lakapī Samoa fautuaga mai le malo.
Na ia saunoa a fa’avae se iuni lakapi fou i le atunuu, o le a i lalo o le pulega a le mālō, ae o loo fa’atali pe taliaina e le itūtino fa’atinā o le lakapī i le lalolagi le World Rugby.
O le Lakapī Samoa e tuto’atasi ma iai lona lava Fa’avae, ae miliona tālā i le tausaga o loo tu’uina iai e le mālō Samoa e fa’agaioi ai polokalame lakapī i le atunuu.
O le ta’ita’ifono o le Lakapī Samoa i le taimi nei, o le ta’ita’i o le itūagai i le palemene, Tuilaepa Sailele Malielegaoi, ma ua ia faamanatu o le iuni lakapi le Lakapi Samoa e tuto’atasi, ma o le so’ona aiā o le mālō i le pulega o le iuni, e ono a’afia ai i le vā ma le World Rugby.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
