Ua manumālō le vaega 'upufai a le Fa’atuatua i le Atua Samoa ua Tasi (FAST) i palota lāiti na toe faia mo itūmālō palota o Vaisigano Numera 2 ma Safata Numera 1, e pei ona sa toe tāloina i le mae'a ai o palota mo le palemene o Samoa i le tausaga na te'a nei.
I le nofoa o Vaisigano Numera 2, na matuā mamao le manumālō o le sui o le FAST Motuopuaa Henney Papali'i i palota e 759, i le 188 palota na maua e le sui na tauvā mo le HRPP, Valasi Tafito Selesele.
I le nofoa o Safata Numera 1, ua tula'i mai ai le isi sui tauvā o le FAST, Tunumafono Clare Tai Tin i palota e 555, na o le 2 palota na sili ai i le isi sui tauvā o le FAST, Tafafuna’i Sa’olotoga Fuimaono Mimio na ia maua palota e 553. O le sui na tauvā mo le HRPP o Tuigamala Vaisilika Tuigamala, e 266 palota na ia maua.
O le palota mo le nofoa o Safata Numera 1 na fa’atonuina ina ua fa’aleaogāina le fa’ai’uga mai le palota tele lea na manumālō mai ai Seve Te'i Fuimaono i le nofoa, ae na fa’aulu se tagi a le isi sui na tauvā, Lea'ana Ronnie Posini, ma aumai ai le fa’ai’uga a le faamasinoga e fa’amaonia uma tuua'iga o lo la auai i faiga fa’a-ālatua ma lē amiotonu ma tulafono o faigāpalota a Samoa.
Ua atili mamao ai i luma le faasiliga a le FAST i nofoa o le palemene o Samoa, lea ua tula'i mai i le 32 nofoa.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
