Na ia saunoa e ono tatau ona silasila le malo i le fa'amalosia o tui puipui o le misela i tamaiti uma i le atunu'u e puipuia ai seisi faama'i tele e pei ona molimauina i le atunuu i le 2019.
Na saunoa Prof Asiata Dr Satupaitea Viali, o ia foi le Vice Chancellor o le Oceania University of Medicine i Samoa, o loo matua maualalo pea le aofa'i o tamaiti ua faia tui puipui i le atunu'u.
I le taimi nei, o loo iai popolega i le ono iai o se faama'i misela i Niu Sila lea foi o loo lipotia e malo 'au faatasi le maualalo ai o le aofai o tamaiti ua faia tui puipui o le misela.
E ono pepesi i Samoa se fa'ama'i misela ona o le to'atele o tagata femalaga'i i le va o Samoa ma Aotearoa.
Na faamanatu e Prof Viali le tulaga na iai le atunuu i le 2019 lea na maliliu ai tagata mai le misela, ma ia fautuaina le malo e faamalosia le faia o tui puipui.
O le misela e sili ona a'afia ai tamaiti e le'i faia ni tui puipui, ae ono matuia mo tagata o loo a'afia i nisi o gasegase ogaoga.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan
