I se talanoaga ma Dr Rita Seumanutafa-Palala o le fa’alapotopotoga le Pacific Islands Creative Arts Australia (PICAA), na ia ta’ua ai o le fale matā’aga lenei o loo iai nisi o measina a atumotu o le Pasefika, Aotearoa ma Torres Straits.
Na saunoa Dr Seumanutafa-Palala o le ‘autū o le aso fa’apitoa lenei mo tagata Pasefika i le NGV, o le fia fa’ailoa i le lautele o Vitoria nisi o measina, siva, ma meataulima a tagata Pasefika e aofia ai motu o le Torres Straits.
“E maua ai fo’i le koko Samoa ma panipopo mo i latou e ‘auai atu i le fa’aaliga”, na ia saunoa.
E lē gata i siva ma fa’afiafiaga a tagata Pasefika, ae o le a molimauina ai le lalagaina o fala ma ‘ato ma nisi o meataulima e se tinā mai atumotu o le Torres Straits.
O le a ‘auai mai fo’i se ali’i e afua mai Niue ae o loo aumau i Aotearoa, i le fa’aaliga o nisi o ana taleni tusiata.
Mo le silafia, o le tinā ia Dr Rita Seumanutafa-Palala ua afu lana tautua i tagata Pasefika i Vitoria. O ia na lālāmua i le fa’amaopoopoina o polokalame tui puipui i le taimi o malosi le pepesi o le fa’ama’i KOVITI. O ia fo’i o se fatu pese ma faia’oga i le a’oa’oina o pese lotu ma musika.
Sau ipu koko ma sau panipopo, ma maimoa ma ‘auai i le Pacific Community Day i le National Gallery of Victoria i le Aso To’ona’i a sau nei.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
