Na faia se a'oga mo tagata Pasefika o loo galulue fa'a-vaitaimi i Ausetalia nei i lalo o le PALM Scheme i le mata'upu o le 'ave ta'avale saogalemū ma tulafono o le auala i Ausetalia.
O lenei a'oga na faia i le Riverina i New South Wales, o se tasi o vaega o Ausetalia o loo to'atele tagata Pasefika o loo aumau ai ma galulue i galuega o le tauina o fua o fa'ato'aga.
O loo to'atele fo'i tagata ua galulue ai i 'a'ai e pei o Griffith i galuega o le tauina o le vine, 'apu, aniani, pateta ma le tele o nisi fua o fa'ato'aga.
E pei ona silafia, o le mata'upu i le 'ave ta'avale saogalemū, e matuā tāua ona o le maliliu o nisi na malaga mai i galuega fa'a-vaitaimi i fa'alavelave ta'avale i Ausetalia nei ma Aotearoa Niu Sila.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan
