O le fa’atonu o le PIMDAN, o le Susuga i le fa’afeagaiga Pastor Albert Tevita, ma na ia ta’ua i se talanoaga ma le SBS Samoan, o le fa’alapotopotoga na fa’avaeina i le 2003 ma le sini ‘autū o le fesoasoani e si’itia le soifuaga manuia o tagata Pasefika i Mount Druitt ma isi vaega o loo alaala ma pāpā ’a’ao ai tagata Pasefika i Sini.
Na ia ta’ua o se tasi o vaega o loo ‘ave iai le fa’amuamua a le PIMDAN o sāuaga i totonu o ‘āiga ma le to’atele o tagata Pasefika, ae maise le tupulaga, o loo molia i soligatulafono.
Na ia fa’aalia fo’i lona fa’anoanoa i le lē talisapaia e tagata Pasefika o avanoa o loo maua i Ausetalia nei. Na ia faia ma fa’ata’ita’iga le tele o avanoa i a’oga lelei e maua ai avanoa o lumana’i manuia, peita’i, e lē o maualuga le va’ai a mātua ma fanau i se tulaga e ‘ausia; e pei ua lava i le i’u mai a’oga, faigaluega i se galuega leipa i se warehouse, ae lē o se tikeri poo se trade.
O se tasi o vaega o loo fa’atāua i tiute ma polokalame a le PIMDAN, o le fa’alauiloa i tagata Pasefika o le tele o a’u’aunaga e mafai ona latou mauaina mai le mālō, e aofia ai fesoasoani lagolago mo tagata e iai mana’oga tumau i lalo o le NDIS ma le tele o penefiti ma fesoasoani mai matagaluega a mālō setete, teritori ma le mālō tele.
