Ua fa’aalia e le fa’auluuluga o ‘au’aunaga a le Salvation Army i Samoa mo fesoasoani i tagata o loo a’afia i fa’afitauli i vaila’au faasāina, Sailivao Tusa Aukusitino Senio, o le methamphetamine ('aisa), le vaila’au fa’asāina ua sili ona fa’atauina ma alumia i Samoa.
O ‘au’aunaga nei a le Salvation Army na amata i le 2018, ma na ta'ua e Sailivao ua latou molimauina le si’itaga i le aofa’i o tagata e sa’ili fesoasoani atu ona o fa’afitauli mai le 'aisa - ua sili atu nai lo le aofa’i o tagata e sa’ili fesoasoani ona o fa’afitauli mai le 'ava malosi ma le mariuana.
I sana saunoa e pei ona lipotia e le Samoa Observer, na ta'ua e Sailivao Senio, o le isi itū ua molimauina, ua lē toe avea Samoa o se atunu’u e na ona fa’aui atu ai vaila’au fa’asāina le 'aisa ma le fa’amoemoe e 'aveina ai i isi maketi, ae ua avea Samoa ma se maketi e alumia ai le methamphetamine i le fa’atauina ma fa’aaogāina e tagata.
O le amataga o le masina nei na fa’ailoa mai ai e leoleo i Samoa ata ma suafa o tagata ua latou saisaia ma molia i le fe’avea’ia ma le fa’atauina o le ‘aisa, e aofia ai se tamaititi e 15 tausaga le matua.
I se fa’aaliga lata mai a le Komesina o leoleo i Samoa, na ia ta’ua ai ua ‘ova i le 50 tagata ua saisaia ma molia talu mai le amataga o le tausaga nei, e aofia ai nisi na pu’eina i ni osofa’iga i le motu tele i Savai’i.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
