O le tagi na fa’auluina e le loia o loo tula’i mo Fiame, Alex Su’a, ma e pei ona fa’aalia i se ripoti a le Samoa Observer, o loo fa’avae le tagi i ni lafoga na faia e le palemia i Savai’i ae o malaga si’o ai le Roadshow a le FAST i le taimi o campaigns mo faigapalota na te’a nei, lea o loo ta'ua i le tagi, na saunoa ai La’aulialemalietoa i le iai o se so’otaga o Fiame Naomi Mata’afa i le maliu o le tama’ita’i o Professor Caroline Gabbard.
E pei ona silafia i nisi o ripoti i le amataga o le tausaga nei, o le tama’ita’i o Lise Marie Schmidt, na ia tusia se tusi ma lafo ni ona kopi i le Ao o le Malo, le komesina o leoleo ma le minisita o le matagaluega o leoleo ma falepuipui, na ia molimau ai i le fa’atonuina o ia e Fiame Naomi Mata’afa e ave’esea ni molimau e fa’asaga i le mata’upu i le maliu o Professor Caroline Gabbard.
Na su’esu’eina e leoleo tu’ua’iga na i le tusi a Lise Marie Schmidt ma aumai ai la latou fa’ai’uga e leai ni molimau fa’atuatuaina e lagolago ai le moni o ia tu’ua’iga.
E fa’auluina le tagi lenei a Fiame Naomi Mata’afa o loo i Aotearoa le palemia, La’aulialemalietoa Leuatea Schmidt i sana si’igā gasegase.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan
