I se su’esu’ega na fa’amaopoopoina e Dr Samuela ‘Ofanoa, o loo galue o se Research Fellow i le Pacific Health Department i Aukilani, na latou iloiloina ai ni ata video o loo fa’asalalauina i le Tik Tok aga’i i le nunu (gout).
Na ia ta’ua i se talanoaga ma le SBS Samoan, o le tele o fe’au ma manatu o loo fa’aalia i ata video nei, o lo’o ta’ita’i sesēina ai tagata Pasefika mai togafitiga e tatau ona faia mo gasegase o le nunu (gout).
O nisi o loo aumai ai fa’amatalaga lē fa’avaea i ni su’esu’ega fa’afoma’i pe fa’asaienisi ma o loo fa’amamafa i tulaga e lamatia ai le soifua maloloina o tagata.
Na ta’ua fo’i e Dr ‘Ofanoa, o le gout e mafai ona faigatā ona togafitia i tagata ua ‘ova le puta o le tino ma iai a’afiaga i fatu ga’o, ona o le faigatā ai i le tino ona fa’amamā le uric acid.
E fa’aaigoaina o le nunu – o se ‘upu fa’amalu e aofia ai gasegase ia e fa’aigoaina o le ‘arthritis’ i le gagana Igilisi.
Na saunoa Dr ‘Ofanoa, o le nunu (gout) lea e matuā tigā ai vaematua ma tamatama’i vae, e mafua mai ina ua to’a (crystallize) le uric acid i so’oga o le vaematua, ma i’u ai ina fulafula ma matuā tetele tigā.
Na ia fautuaina le va’ai o lau foma’i mo se fuafuaga o togafitiga ma fautuaga i auala e tausia ai le gout, e aofia ai le pulea o le taumafa ma le ‘ava malosi.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
