O le fa’alapotopotoga le Saltwater Alliance na fa’avae e ni tama’ita’i Pasefika ma tagata muamua i Ausetalia e tuleia ai le malamalama i a’afiaga o tagata i fesuia’iga o le tau ma fesoasoani ai i le fa’alauiloaina o tū ma aganu’u.
E aofia ai i le fa’alauiloaina o le tāua o tū ma aganu’u a le Pasefika ma tagata muamua le a’oa’oina ma fa’aaliga o meataulima, siva, tala fa’atino ma solo, atoa ai ma le tapenaina o taumafa e masani ai le Pasefika ma tagata muamua i Ausetalia nei.
I le talanoaga lenei ma le tama’ita’i Samoa o Rosaline Parker, o se tasi o loo lālāmua i le komiti fa’afoe a le Saltwater Alliance, na ia ta’ua ai le naunauta’iga e sa’ili i auala e āfua mai i tū ma aga masani a le Pasefika, nisi o manatu e fō’ia ai fa’afitauli e pei o fesuia’iga o le tau, ma fesoasoani ai i alo ma fanau tuputupua’e i Ausetalia nei.
O le fa’ai’uga o le masina nei, (Aso 30 o Me), o loo fa’amoemoe e faia ai se fa’aaliga fa’alauiloa a le Saltwater Alliance i le pitonu’u o Bidwill i Sisifo o Sini.
Na saunoa Rosaline Parker i nisi o fa’aaliga e pei o le a tele ai fale’aiga ma taumafa ‘ese’ese a atunu’u o le Pasefika, o le a auai iai se tama’ita’i o se tagata muamua e lava le tomai i le lalagaina o meataulima e fa’aaogāina ai le laufala, atoa ai ma nisi o alo ma fanau a le Pasefika ma tagata muamua e fa’aali ai a latou taleni.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
