O le tama’ta’i Samoa e suafa ia Charlotte Allen o loo aumau i se nu’u o Tagata Muamua, le Mutitjulu i Uluru, ma o loo galue ai e lē gata o se faia’oga, ae ua fa’atuatuaina e tagata o le nu’u i le tofiga Sui Fa’atonu, le ACEO o le Kamupani, le Mutitjulu Aboriginal Community Corporation.
I le talanoaga lenei ma le SBS Samoan, na fa’amatalaina e Charlotte Allen le mafua’aga o lona tu’ua o lana galuega ma lona ‘āiga i Western Sydney, ae malaga ma lona to’alua e galulue ma tagata Mutitjulu i Uluru i le Northern Territory.
Na ia ta’ua le faigatā i le amataga ona fa’amasani i tū ma aganu’u a tagata Mutitjulu, ae ona o le malosi lava o le vala’au ma le fa’atuatuaga i le aogā o le soifuaga tautua, ua faigofie ai ona aumau i se nu’u maotua ma Tagata Muamua o Ausetalia.
Na ia ta’ua nisi o fa’afitauli o loo feagai ma ia i le galuega, ae maise i le tauanauina o fanau e auai i a’oga ma polokalame i le atina’eina o le soifuaga manuia o tagata Mutitjulu.
O lona to’alua, o se ali’i Samoa, o loo faigaluega fo’i i le nu’u, ma o loo galue i le fa’aleleia o fale ma meatotino, se caretaker.
O le nu’u o Mutitjulu ua tele ni tausaga o galue ai seisi tamali’i Samoa, le Susuga a Andrew Sua, ina ua mae’a ai o le ‘ova i le 20 tausaga o tautua ma galue i le tautuaina o Tagata Muamua i Alice Springs ma isi pitonu’u o le Northern Territory.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
