Toa Samoa final o le Pacific Championships

Ua sao le Toa Samoa i le final o le Rugby League Pacific Championships ina ua manumalo i le Mate Ma'a a Tonga, 34 - 6.

Payne Haas o le Toa Samoa i le ta'aloga ma le Mate Ma'a i le Aso Sa na te'a nei. (Image by AAP).

O se ta'aloga na mata'ina i le tele o sikoa a le Toa Samoa ma le leai o se tulaga na fa'aletonu i le 'au atoa.

Na maitauina fo'i ona o le louloua o le tau ina ua 'emo le uila, pa faititili, ma taofia ai le ta'aloga mo le 'ova i le itula ma 'afa.

Peita'i e le'i taofia ai le lagolago ma onosa'i a le 'aumaimoa, na ina ua toe amata le ta'aloga, na fa'aauau ona osofa'i e le Toa Samoa le laina a Mate Ma'a ma fa'aopoopo ai nisi o sikoa lea ua mafai ai ona sao atu i le final o le Pacific Championships.

O le isi itu na maitauina i le ta'aloga lenei, ona o se matati'a na fa'atuina ai o le aupito to'atele o tagata na auai e maimoaina se ta'aloga lakapi liki i Ausetalia, o se ta'aloga e le'i ta'a'alo ai le 'aufili a Ausetalia, le Kangaroos.

E lata i le to'a 45,000 tagata na maimoaina le ta'aloga a le Toa Samoa ma le Mate Ma'a i le malae o Suncorp i Brisbane.

Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan