Togafitiga maua fua mo nifo o fanau.

E 'ova i le miliona ma le 'afa le aofa'i o tamaiti i Ausetalia e le o faia togafitiga faifai pea mai se foma'i nifo.

E taua le va'ai o se foma'i nifo mo le ola maloloina o fanau. (Getty Images). Credit: Lisa Wiltse/Getty Images

E tusa ai ma se fa'amatalaga a le Asosi a Foma'i Nifo (Australian Dental Association), o le to'atele o matua i le atunu'u e le o silafia fesoasoani a le malo tele e mafai ai ona maua fua togafitiga o nifo o fanau i lalo o le Medicare.

O aiga uma e iai fanau i le va o le 0-17 tausaga le matutua, o loo mauaina se penefiti mai le malo tele, e mafai ona talosaga mo le fesoasoani e $1,132 i le ta'i 2 tausaga mo togafitiga o nifo o le fanau.

Na fa'aalia i se saunoaga a le peresitene o le Asosi a Foma'i Nifo, o le le togafitia o fa'ama'i o nifo e mafai ona mafua mai ai le tele o nisi gasegase matuia, e le gata i le fanau, ae fa'apena i tagata matutua.