Na molimauina le tumutumu o tagata i ofisa o itumalo ma matagaluega o le malo Samoa i le vaiaso nei i le taliaina o le ta'i $150 o le fesoasoani mai le malo Samoa, o se fesoasoani fa'amāmā'avega mo le toe fo'i o fanau i a'oga.
E pei ona lipotia e le Samoa Observer, na amata mai le 6 i le taeao e tau i le 6 i le afiafi o gasolo tagata i ofisa o pulega faaitumalo i le taliaina o le meaalofa $150.
O nisi na tumutumu i ofisa o le malo, ae maise le ofisa o pepa fanau, e toe fa’afou ma lolomi pepa fanau e avea ma pepa fa’amaonia e maua ai le $150.
Ma seisi tala mai Ausetalia nei:
O loo faitioina e nisi o fa’alapotopotoga le fa’ai’uga a le malo tele e taofia ai ona toe ulufale mai tagata o loo umia visa lē tumau mai nisi o atunuu.
I lalo o le fuafuaga a le malo, o le a tu’uina ai le pule ma le aiā fa’apitoa i le minisita o Home Affairs e taofia ai mo le 6 masina ona talia le visa e toe ulufale mai ai tagata mai nisi o atunuu ua filifilia.
Ua fa’aalia e le malo ma le itūagai popolega i le fa’aaogā e nisi o le vevesi i Sasae i Totonu e talosaga ai e nonofo mau i Ausetalia pe a toe taliu mai.
I se fa’amatalaga a le Asylum Seekers Resource Centre, o le fuafuaga lenei o le a tapunia ai le faitoto'a i tagata o loo fia sosola 'ese mai sauaga ma taua.
Na ta'ua e le taitai o le Greens, Larissa Waters, o se fuafuaga ua save'u ai le ta'ele o le paelo.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
