E ono o’o i le 15 tausaga i le falepuipui fa’asalaga o tagata e auai i fa’alapotopotoga ua lisiina e le malo o hate groups, ae o loo iai popolega i nisi i le tulaga e ono āfaina ai le sa’olotoga o fa’amatalaga i lalo o tulafono taufa’aofi o loo fa’atalanoaina nei i le palemene tele.
Talu mai le osofaiga terorisi i Bondi Beach i le masina na te'a nei, o loo malosi le valaau i le malo tele i ni tulafono e puipuia ai le atunu’u mai lafoga fa’atauemu ma le fa’atulafonoina le umia e tagata sivili o fana.
"The laws will set a principles-based test for conduct and speech that incites racial hatred towards another person or group. The terrorists at Bondi Beach had hatred in their minds but guns in their hands and this bill will address both those issues."
O le tulafono taufa’aofi, o loo fa’aigoaina o le Combatting Antisemitism, Hate and Extremism Bill.
O loo aofia ai ni itu’aiga soligatulafono fou, si’itaga i fa’asalaga o soligatulafono hate crimes, ma puipuiga fa’aopoopo i le resitaraina o fana.
E mana'omia e le malo le lagolago a le itūagai ma sui tuto'atasi e pasia ai le tulafono taufa’aofi, ma ua vave ona fa’aalia le tetee iai o nisi o sui - e pei o le taitai o le National Party, David Littleproud i se talanoaga ma le Sky News:
"The legislation around hate speech is complex, as is gun laws, and the reality is to try and put them into one bill disrespects the Parliament and it actually flies in the face of his words about bringing the Parliament together in a cooperative way. The reality is if you were really serious about bringing the country together and bringing the Parliament together you would have these two serious and complex policy areas separated."
O loo iai foi vaega o le tulafono taufa’aofi o loo lē taliaina gofie e nisi i le itūagai - e pei o le fa’auigaina o le hate speech poo lafoga fa’atauemu.
I lalo o le tulafono taufa’aofi, o se solitulafono le fa’aosoosoina pe tuleia fa’alauaitele o manatu e fa’atauemu pe fa’aoso ita i seisi tagata poo se vaega o ni tagata e fa’avae i le lanu, atunu’u e afua mai ai, talitonuga, poo sona tupu'aga.
O se faife'au poo se ositaulaga e faia ni lafoga poo lauga e fa’aoso ai i le ita ma fa’atauemu i isi tagata pe folafola ai ni faiga sauā i nisi tagata, e ono oo i le 12 tausaga i le falepuipui le fa’asalaga.
Peita'i o loo aofia ai ma se faatagaga se exemption i le faitauina sa'o mai o vaega o tusi pa'ia i se lauga.
O le vaega lea o loo popo'e ma atugalu ai le sui o le itūagai, Jonathon Duniam.
"Well, stakeholders have indicated of course there are concerns around the depth and breadth of the defence for people reading from religious scripture. There are definitional issues around certain elements of the legislation."
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
