ඔස්ට්‍රේලියාවේ කොවිඩ් වසංගතය යළිත් දරුණු ලෙස හිස ඔසවමින් පවතී.
පසුගිය සතිය තුළ කොවිඩ් ආසාදිතයින් 300,000 ක් වාර්තා විය.
එමෙන්ම Omicron BA.4 සහ BA.5 රැල්ලේ උච්චතම අවස්ථාව එළඹෙන අගෝස්තු මාසයේදී අපේක්ෂා කරන බවත් ඉදිරි සතිවලදී තවත් සිය දහස් ගණනක් ආසාදන ඇතිවිය හැකි බවත් සෞඛ්‍ය අමාත්‍ය Mark Butler අනතුරු ඇඟවීය.
මේ හේතුවෙන්ම ඔස්ට්‍රේලියානුවාසීන්ට නවතම COVID-19 උපදෙස් මධ්‍යම රජය විසින් නිකුත් කර තිබේ.
Highlights
- පොදු ප්‍රවාහන සේවා භාවිතයේදී ඇතුළු සෙනග පිරුණු ගෘහස්ථ ස්ථානවල මුව ආවරණ පළඳින ලෙස ඔස්ට්‍රේලියාවේ ප්‍රධාන වෛද්‍ය නිලධාරීවරයා ඉල්ලා සිටියේය.
- තම සේවකයන්ට සේවා ස්ථානයේ මුව ආවරණ පැළඳීම හෝ නිවසේ සිට වැඩ කිරීම අවශ්‍යද යන්න තීරණය කිරීම සේවා යෝජකයන් සතු බව ඔහු පැවසීය.
- පළමු බූස්ටර් එන්නත ලබාගත් ප්‍රමාණය තවමත් අඩු ප්‍රමාණයක් වන අතර, තුන්වන මාත්‍රාව ලබා ඇත්තේ ජනගහනයෙන් 70.9% ක් පමණි.
මුව ආවරණ පැළඳීම
මුව ආවරණ පැළඳීම සම්බන්ධයෙන් ඔස්ට්‍රේලියාවේ ප්‍රධාන වෛද්‍ය නිලධාරී මහාචාර්ය Paul Kelly ජූලි 19 වනදින පැහැදිලි උපදෙස් ලබාදුන්නේය.
පොදු ප්‍රවාහන සේවා භාවිතයේදී ඇතුළු සෙනග පිරුණු ගෘහස්ථ ස්ථානවල මුව ආවරණ පළඳින ලෙස ඔහු ඉල්ලා සිටියේය.
මුව ආවරණ පැළඳීම අනිවාර්ය කිරීමට අගමැති Anthony Albanese විරුද්ධත්වය පල කළ නමුත් ඒවා ඵලදායී ලෙස ක්‍රියාත්මක නොකළහොත් ඒවා නිෂ්ඵල බවට තර්ක කළේය.
මුව ආවරණ පැළඳීම දිරිමත් කිරීම සඳහා ඇතැම් මහජන සෞඛ්‍ය ව්‍යාපාර ද මේ වන විට සමාජය තුළ විශාල ලෙස පැතිරෙමින් පවතී.
NSW ප්‍රධාන වෛද්‍ය නිලධාරි Kerry Chant ගෘහස්ථව සහ සේවා ස්ථානයේ මුව ආවරණ පැළඳීම දිරිමත් කිරීම සඳහා ඇගේ සම වයසේ මිතුරන් සමඟ TikTok වෙත ගොස් තිබීම ද කැපී පෙනේ.
නිවසේ සිට රාජකාරී කිරීමට සලකා බැලීම
සේවා යෝජකයින් තම සේවකයින්ගේ යහපත සඳහා වන දේ තීරණය කිරීමේදී ඔවුන්ගේ රාජකාරී සෞඛ්‍ය සහ ආරක්ෂණ ක්‍රමවේද පිළිබඳ නැවත විමර්ශනය කළ යුතු බව ඔස්ට්‍රේලියාවේ ප්‍රධාන වෛද්‍ය නිලධාරී මහාචාර්ය Paul Kelly පැවසීය.
තම සේවකයන්ට සේවා ස්ථානයේ මුව ආවරණ පැළඳීම හෝ නිවසේ සිට වැඩ කිරීම අවශ්‍යද යන්න තීරණය කිරීම සේවා යෝජකයන් සතු බව ඔහු පැවසීය.
එමෙන්ම සේවකයින් අසනීප වූ විට ඔවුන්ට නිවාඩු ලබා ගැනීමට අවස්ථාව සලසා දීමද මේ කාලයේ සමාගම් ඇතුළු සේවා යෝජකයින්ගේ වගකීමක් බව මහාචාර්ය Paul Kelly අවධාරණය කළේය.
සියලුම සේවා යෝජකයින් තම කාර්ය මණ්ඩලය නිවසේ සිට රාජකාරී කිරීමට දිරිමත් කිරීම “හොඳ පුරුද්දක්” නමුත් එය එක් එක් සේවකයා අනුව සලකා බැලිය යුතු බව සෞඛ්‍ය අමාත්‍ය Butler සඳහන් කළේය.
"මෙය සේවා යෝජකයන් ඒකපාර්ශ්විකව ගන්නා තීරණයක් නොවිය යුතුයි. එහිදී සේවා යෝජකයින් තම සේවකයින් සමඟ සම්බන්ධ විය යුතුයි. එය රැකියාව, සෞඛ්‍යය සහ ආරක්ෂාව සඳහා ඇති හොඳම ප්‍රවේශය වන අතර, ඉතා තාවකාලික පදනමක් මත නිවසේ සිට රාජකාරී කිරීමේ විධිවිධාන ක්‍රියාත්මක කළ හැකි ප්‍රමාණය පිළිබඳව අවබෝධයක් ලබා ගැනීමයි." යනුවෙන් ද ඔහු පැහැදිලි කළේය.
කොවිඩ් එන්නත් සහ බූස්ටර් එන්නත්
තුන්වන මාත්‍රාව තවමත් ලබා ගැනීමට නොහැකි වූවන් සඳහා, COVID-19 වයිරසයට එරෙහිව ඔවුන්ව ආරක්ෂා කිරීමට පළමු එන්නත් දෙක පමණක් ප්‍රමාණවත් නොවන බව බලධාරීන් අනතුරු අඟවා ඇත.
පසුගිය සතියේ එන්නත් ලබා ගැනීමේ සුදුසුකම් පුළුල් කිරීමෙන් පසු මිලියන භාගයකට වඩා ඔස්ට්‍රේලියානුවන් සිව්වන එන්නත ලබාගෙන තිබේ.
නමුත් පළමු බූස්ටර් එන්නත ලබාගත් ප්‍රමාණය තවමත් අඩු ප්‍රමාණයක් වන අතර, තුන්වන මාත්‍රාව ලබා ඇත්තේ ජනගහනයෙන් 70.9% ක් පමණි.
තුන්වන මාත්‍රාව ලබාගැනීමේ අනුපාතය ප්‍රමාණවත් තරම් වේගයෙන් වෙනස් නොවන බව සෞඛ්‍ය අමාත්‍ය Butler අඟහරුවාදා (ජූලි 19) කැන්බරා නුවර වාර්තාකරුවන්ට පැවසීය.
මිලියන පහකට වැඩි ඕස්ට්‍රේලියානුවන් ඔවුන්ගේ දෙවන මාත්‍රාව ලබාගෙන අවම වශයෙන් මාස හයක් ගත වී ඇතත් තවමත් තුන්වන මාත්‍රාවක් ලබාගෙන නොමැති බවද ඔහු පෙන්වා දුන්නේය.
මේ වන විට, වයස අවුරුදු 30 ට වැඩි සියලුම ඔස්ට්‍රේලියානුවන් ඔවුන්ගේ සිව්වන මාත්‍රාව ලබා ගැනීමට සුදුසුකම් ලබා ඇති අතර, වයස අවුරුදු 50 ට වැඩි නම්, එය බෙහෙවින් නිර්දේශ කෙරේ.
දැඩි ලෙස ප්‍රතිශක්තිකරණය හීන වූවන් සඳහා මෙය ඔවුන්ගේ පස්වන එන්නත් මාත්‍රාව වේ.
ඩිජිටල් සහ සමාජ මාධ්‍ය ජාලයන්හි අපගේ SBS සිංහල සේවය හා සම්බන්ධ වීමට:
SBS Radio App: App Store හෝ Google Play වෙතින් SBS Radio App නොමිලයේ Download කරගෙන සජීවීව SBS සිංහල වැඩසටහන සහ අපගේ අනෙකුත් podcast වලට සවන් දෙන්න.
Antivirals: COVID-19 ඖෂධ ගත හැකිද?
COVID-19 සඳහා ධනාත්මක බව පරීක්‍ෂා කරන පහත සඳහන් ඛාණ්ඩවල ඔස්ට්‍රේලියානුවන් සඳහා ප්‍රතිවෛරස් ප්‍රතිකාර තිබේ.
- වයස අවුරුදු 70 ට වැඩි
- සෞඛ්‍ය අවදානම් සාධක දෙකක් සමඟ වයස අවුරුදු 50 ට වැඩි
- වයස අවුරුදු 30 ට වැඩි, සෞඛ්‍ය අවදානම් සාධක දෙකක් සහිත ඇබෝර්ජීනියානු හෝ ටොරස් දූපත් වැසියන් ලෙස හඳුනා ගන්නා පිරිස්
- වයස අවුරුදු 18 ට වැඩි, මධ්‍යස්ථ ප්‍රමාණයේ සිට බරපතල මට්ටම දක්වා ප්‍රතිශක්තිකරණය අඩුවූ පුද්ගලයින්
ආබාධ සහිත පුද්ගලයින්, දියවැඩියාව, හෘදයාබාධ, රුධිර පිළිකා සහ තවත් බොහෝ සෞඛ්‍ය ආබාධ තත්වයන් අවදානම් සාධක වේ.
කොවිඩ් වයිරසය සඳහා ධනාත්මක බව පරීක්‍ෂා කිරීමෙන් පසු ප්‍රතිවයිරස් ලබා ගැනීම සඳහා සෑම විටම තම වෛද්‍යවරයා සමඟ සාකච්ඡා කළ යුතු අතර ඔසුසැලකින් ඖෂධ වට්ටෝරුවක් හරහා ලබා ගත හැකිය.
Read & Listen More
වැඩි වන නිවාස කුලිය ගැන කුලී නිවැසියෙක් වන ඔබට ඇති අයිතීන් මොනවද?
