நியூசவுத் வேல்ஸ் மாநிலத்தில் சைக்கிளோட்டிகளுக்கு மிக அருகில் வாகனமோட்டிச் செல்பவர்களுக்கு கடும் அபராதம் விதிக்கும்வகையில் புதிய சட்டம் அமுல்படுத்தப்படுகின்றது.
இதன்படி 60 km/h அல்லது அதற்கு குறைவான வேக கட்டுப்பாடு உள்ள வீதிகளில் செல்பவர்கள், சைக்கிளோட்டியிலிருந்து ஆகக்குறைந்தது 1 மீட்டர் இடைவெளிவிட்டுச் செல்ல வேண்டும்.
60km/h-க்கு அதிக வேகக்கட்டுப்பாடு உள்ள இடங்களில் ஒன்றரை மீட்டர் இடைவெளியைப் பேண வேண்டும்.
இதனை மீறி சைக்கிளோட்டிகளுக்கு மிக அருகில் வாகனமோட்டிச் செல்பவர்கள் தண்டப்பணமாக 330 டொலர்களைச் செலுத்தும் அதேநேரம் 2 demerit புள்ளிகளையும் செலுத்த நேரிடும்.
கடந்த 2 வருடங்களாக இப்புதிய சட்டம் பரீட்சித்துப் பார்க்கப்பட்டதாகத் தெரிவித்த நியூ சவுத் வேல்ஸ் மாநில பெருந்தெருக்கள் அமைச்சர் Melinda Pavey, இதன் ஊடாக 15 வீதமான சைக்கிள்-வாகன விபத்துக்கள் குறைக்கப்பட்டதாகவும், இதையடுத்து குறித்த சட்டம் அமுலுக்கு கொண்டுவரப்படுவதாகவும் தெரிவித்தார்.
இதேபோன்ற சட்டம் மேற்கு ஆஸ்திரேலியா மற்றும் குயின்ஸ்லாந்து மாநிலங்களில் ஏற்கனவே அமுலில் உள்ளமை குறிப்பிடத்தக்கது.
